इचलकरंजी मतदारसंघातुन आमदार डॉ. राहुल आवाडे यांची आमदारपदी निवड झाल्यानंतर त्यांनी विकासकामांचा धडाका लावलेला आहे. तसेच प्रत्येक क्षेत्रातील कामकाज व्यवस्थित चालू आहे का यावर लक्ष केंद्रित करीत आहेत. आमदार राहुल आवाडे हे मंगळवारी सकाळी थेट पुरवठा कार्यालय येथे आले. त्यावेळी त्यांना कामकाजाची वेळ झाली तरी कार्यालय बंदच असल्याचे निदर्शनास आले. त्यामुळे आमदार आवाडे यांनी थेट प्रांताधिकारी आणि अप्पर तहसिलदार यांना व्हिडीओ कॉल करत कार्यालयाच्या स्थितीची माहिती दिली. त्यावेळी अप्पर तहसिलदार शेरखाने हे तातडीने येवून पाहणी केली असता कार्यालय बंद असल्याचे अधिकारी वा कर्मचारी उपस्थित नसल्याचे निदर्शनास आले.
त्यावर आमदार आवाडे यांनी प्रभारी नायब तहसिलदार पोळ यांच्यावर तात्काळ कठोर कारवाई करण्याचे आणि अन्य अधिकारी व कर्मचान्यांना कारणे दाखवा नोटीस बजावण्याबाबत सूचना केल्या. त्यावर अप्पर तहसिलदार शेरखाने यांनी आमदार आवाडे यांनी केलेल्या सूचनांबाबत जिल्हाधिकाऱ्यांकडे शिफारस पाठवत असल्याचे सांगितले. यावेळी संगांयो समिती अध्यक्ष अॅड. अनिल डाळ्या, बाळासाहेब कलागते, राजू बोंद्रे, कोंडीबा दवडते, सुखदेव माळकरी, तात्या कुंभोजे, नितेश पवार, बंडा मुळीक, आदी उपस्थित होते.
आठवडाभरापूर्वी सूचना देऊनही येथील पुरवठा कार्यालयातील अधिकारी व कर्मचाऱ्यांच्या कामकाज पध्दतीत कोणताही बदल झाला नसल्याचा प्रत्यय दस्तुरखुद्द आमदार राहुल आवाडे यांना दुसऱ्यांदा आला. या प्रकाराची गंभीरपणे दखल घेत आमदार आवाडे यांनी प्रभारी नायब तहसिलदार सुरेखा पोळ यांच्यावर तात्काळ कठोर कारवाई करण्याचे आणि उशीरा येणाऱ्या अधिकारी व कर्मचाऱ्यांना कारणे दाखवा नोटीस बजावण्याच्या सूचना अप्पर तहसिलदार सुनिल शेरखाने यांना दिले.
