कोरोनानंतर वर्क फ्रॉम होम आणि पार्ट टाईम जॉब हे शब्द गुगलवर सर्वाधिक सर्च केले गेले. अर्थात, जे काही जास्त शोधले जाते, ते ट्रेंड बनते. अशा परिस्थितीत फसवणूक करणारेही या प्रवृत्तीवर बारीक नजर ठेवून असतात. तुम्ही गुगलवर जे पाहता ते अगदी बरोबर असेलच असे नाही, अनेकदा फसवणूक करणारे तुमचा ट्रेंड लक्षात घेऊन खोट्या वेबसाइट तयार करतात आणि घरी बसून पार्ट टाईम जॉबचे आमिष दाखवून लोकांना फसवायला सुरुवात करतात.
तुम्ही अशा अनेक बातम्या पाहिल्या असतील ज्यात बनावट कंपन्या तुम्हाला कामाच्या बदल्यात चांगले पैसे देण्याचे आमिष दाखवून फसवतात. त्यांच्या जाळ्यात अडकून अलीकडच्या काळात अनेकांची बँक खाती रिकामी झाली आहेत. परंतु सरकारने या बनावट वेबसाइट्सवर मोठी कारवाई करत 100 हून अधिक फसव्या वेबसाइट्सवर बंदी घातली आहे.
मिळालेल्या माहितीनुसार, या फसव्या वेबसाईट्स भारतातून नाही, तर देशाबाहेरून चालवल्या जात होत्या. त्यांच्यामार्फत अवैध गुंतवणूकही केली जात होती. मेसेंजर आणि डिजिटल जाहिरातींद्वारे लोकांना या नोकऱ्यांचे आमिष दाखवण्यात आले. नॅशनल सायबर क्राइम थ्रेट अॅनालिसिस युनिट (NCTAU) च्या इंडियन सायबर क्राइम कोऑर्डिनेशन सेंटर (I4C) ने गेल्या आठवड्यात या वेबसाइट्स ओळखल्या आणि केंद्राने त्या बंद करण्याची शिफारस केली. या वेबसाइट वापरकर्त्यांना खोट्या नोकरी आणि गुंतवणुकीच्या ऑफर देऊन फसवत होत्या. माहिती तंत्रज्ञान कायदा, 2000 अंतर्गत इलेक्ट्रॉनिक्स आणि माहिती तंत्रज्ञान मंत्रालयाने या वेबसाइट्स ब्लॉक केल्या होत्या.
या वेबसाइट्सच्या माध्यमातून लोकांना अडकवण्यासाठी परदेशात बसलेले लोक डिजिटल जाहिराती, चॅट मेसेंजर आणि भाड्याने घेतलेल्या खात्यांची मदत घेत असल्याचे अहवालात सांगण्यात आले. हे लोक क्रिप्टो करन्सी, एटीएममधून परदेशात पैसे काढणे आणि आंतरराष्ट्रीय फिनटेक कंपन्यांच्या माध्यमातून फसवणूक केलेली रक्कम काढायचे.
