बॉलिवूड आणि मराठी चित्रपटसृष्टीमध्ये जुने चित्रपट पुन्हा प्रदर्शित करण्याची क्रेझ वाढली आहे. याच ट्रेन्डमध्ये आणखी एक मराठी चित्रपट जोडला जाणार आहे. एस. एम. पी प्रोडक्शनचा ‘अल्याड पल्याड’ हा चित्रपट एक वर्षानंतर पुन्हा प्रदर्शित होत आहे. थरार आणि रहस्य यांनी भरलेला हा चित्रपट 27 जूनपासून प्रेक्षकांच्या भेटीला येणार आहे. या चित्रपटाने गेल्यावर्षी बॉक्स ऑफिसवर खूप चांगली कमाई केली होती.
मकरंद देशपांडे, गौरव मोरे (Gaurav More), संदीप पाठक, सक्षम कुलकर्णी, सुरेश विश्वकर्मा,चिन्मय उदगीरकर,भाग्यम जैन,अनुष्का पिंपुटकर या कलाकारांनी ‘अल्याड पल्याड’मध्ये महत्त्वाची भूमिका साकारली होती. या सिनेमाला प्रेक्षकांनी भरभरून प्रेम दिलं होत. त्यामुळे निर्मात्यांनी या चित्रपटाचा सिक्वेल बनवण्याचीदेखील घोषणा केली आहे. पण त्याआधी हा चित्रपट 27 जूनपासून पुन्हा चित्रपटगृहांमध्ये दाखल होणार आहे. शैलेश जैन आणि महेश निंबाळकर यांनी या चित्रपटाची निर्मिती केली आहे. प्रीतम एसके पाटील यांनी चित्रपटाचे दिग्दर्शन केले आहे.
‘अल्याड पल्याड’मधील संवाद, अभिनय, कथा, संगीत या सगळ्या गोष्टी प्रेक्षकांना खूप आवडल्या होत्या. आता हीच जादू पुन्हा अनुभवण्याची संधी मिळणार आहे. चित्रपटाच्या टीमने सोशल मीडियावर पोस्टर शेअर करून ही माहिती दिली आहे. त्यासोबत कॅप्शनमध्ये लिहिले आहे, “वर्षपूर्तीनंतर पुन्हा येतोय आपल्या भेटीला ‘अल्याड पल्याड’ 27 जूनपासून”.
चित्रपटाचे निर्माते शैलेश जैन आणि महेश निंबाळकर यांनी आनंद व्यक्त केला. त्यांनी म्हटले की, ‘आम्ही चित्रपटाची निर्मिती केली तेव्हा विचारही केला नव्हता की, या चित्रपटाला प्रेक्षक डोक्यावर घेतील. आम्ही प्रामाणिकपणे काम केलं त्याचं यश आम्हांला मिळालं. आज पुन्हा एकदा हा चित्रपट प्रदर्शित करता येतोय याचा आनंद आहे. यासाठी आम्ही प्रेक्षकांचे आभारी आहोत. आम्हाला परत एकदा तोच अनुभव आणि प्रेक्षकांचं भरभरून प्रेम मिळेल याची खात्री आहे.”
