17 कोटींची शाळा, वर्षाच्या आतच पितळ उघडं, नवी मुंबईत स्लॅब पडून शिक्षिकेला दुखापत

वर्गात शिक्षिका शिकवित असताना इमारतीच्या स्लॅबचे प्लास्टर वरून कोसळल्याचा धक्कादायक प्रकार नेरुळमधील महापालिकेच्या शाळेत घडला. नेरुळ सेक्टर ३० मधील भूखंड क्रमांक ८अ वर सुमारे १७.७५ कोटी खर्चुन नव्याने उभारण्यात आलेल्या शाळेत हे घडल्याने आश्चर्य व्यक्त होत आहे. वर्गात शिकवत असलेली वर्गशिक्षिका सुदैवाने यातून थोडक्यात बचावली आहे. मात्र यामुळे शिक्षक आणि विद्यार्थ्यांच्या सुरक्षेचा प्रश्न ऐरणीवर आला आहे.

शालेय शैक्षणिक वर्ष १६ जून रोजी सुरू झाले. शाळा सुरू झाल्यापासून चौथ्याच दिवशी, म्हणजे गुरुवारी इयत्ता ६वी ‘क’ चा वर्ग सुरू असताना अचानक त्या वर्गातील स्लॅबचे मोठे दोन भाग खाली कोसळले. यावेळी वर्गात ३६ विद्यार्थी उपस्थित होते. वर्गशिक्षिकेच्या डोक्यावर ह्या स्लॅबचा काही भाग पडला. त्यांना डोक्यावर किरकोळ दुखापत झाली आहे. या धक्कादायक घटनेमुळे विद्याथ्याँच्या आणि शिक्षकांच्या जीवितास मोठा धोका निर्माण झाला असून, त्यांच्या मनात भीतीचे वातावरण निर्माण झाले आहे.

या नवीन शाळा इमारतीमध्ये आठवी ते नववीचे वर्ग सुरू करण्यात आले आहेत. मात्र या शाळेत अनेक सोयी-सुविधांचा अभाव आहे. इमारतीला अनेक ठिकाणी तडे गेले आहेत. पहिल्या मजल्यावर मुख्य बीमच्या मधोमध मोठे तडे पडल्यामुळे तेथून पाण्याची संततधार सुरू आहे. लगतच्या भिंतीवरसुद्धा तडे पडले आहे. या गळतीमुळे खाली पडणारे पाणी वाहून एका वर्गामध्ये जमा होत आहे. शाळेच्या इमारतीच्या गच्चीवर ठेवलेल्या प्लास्टिकच्या पाण्याच्या तीन टाक्यांपैकी एक टाकी तुटून खाली पडली आहे. मुळात शाळेच्या गच्चीवर प्लास्टिकच्या टाक्याऐवजी सिमेंटची टाकी असणे अपेक्षित आहे.

ही संपूर्ण इमारत फिरून पाहिली असता करण्यात आलेले बांधकाम निकृष्ट दर्जाचे असल्याचे स्पष्ट दिसत आहे. इमारतीचे बांधकाम करणाऱ्या कंत्राटदाराला काळ्या यादीत टाकावे, अशी मागणी शिवसेना उबाठा गटाचे उपशहर अध्यक्ष समीर बागवान यांनी केली आहे. हे बांधकाम करणाऱ्या कंत्राटदाराची तात्काळ चौकशी करून त्याला काळ्या यादीत टाकण्यात यावे, अशी मागणीही त्यांनी केली.

सीसीटीव्ही कॅमेरेही नाहीत शाळांमध्ये सीसीटीव्ही कॅमेरा लावणे अनिवार्य करण्यात आले असूनही या शाळेमध्ये अद्याप कॅमेरे बसविण्यात आलेले नाहीत. विद्यार्थ्यांच्या शौचालयाबाहेर सूचनाफलक, कुठलेही चिन्ह लावलेले नाही.