मुंबई- फिल्म इंडस्ट्रीतून एक धक्कादायक बातमी समोर येत आहे. प्रसिद्ध आणि ज्येष्ठ साऊथ अभिनेते(actor) कोटा श्रीनिवास राव यांचे निधन झाले आहे. रविवारी, 13 जुलै रोजी पहाटे त्यांनी हैदराबादमधील फिल्मनगर येथील त्यांच्या राहत्या घरी अखेरचा श्वास घेतला. ते 83 वर्षांचे होते. अवघ्या तीन दिवसांपूर्वीच त्यांचा वाढदिवस साजरा केला होता. कोटा श्रीनिवास गेल्या काही दिवसांपासून आजारी असल्याचे म्हटले जात आहे. ज्येष्ठ अभिनेते (actor)कोटा श्रीनिवास यांच्या निधनाने संपूर्ण साऊथ फिल्म इंडस्ट्रीला मोठा धक्का बसला आहे.
ते चार दशकांहून अधिक काळ फिल्म इंडस्ट्रीत सक्रिय होते. फिल्मी कारकिर्दीत त्यांनी 750 हून अधिक चित्रपटांत काम केले. तेलुगू चित्रपटसृष्टीत स्वतःची एक वेगळी ओळख निर्माण केली. 10 जुलै 1942 रोजी आंध्र प्रदेशातील कृष्णा जिल्ह्यातील कांकीपाडू येथे जन्मलेल्या कोटा श्रीनिवास राव यांनी 1978 मध्ये ‘प्रणम खरेधू’ या चित्रपटातून फिल्म इंडस्ट्रीत प्रवेश केला. त्यांनी साकारलेल्या खल भूमिकांना प्रेक्षकांची खूप पसंती मिळाली. खलनायकाच्या भूमिकांसाठी कोटा श्रीनिवास यांनी अनेक पुरस्कारही जिंकले. पण याशिवाय त्यांनी काही सकारात्मक आणि विनोदी भूमिकाही साकारल्या आहेत.
श्रीनिवास हे भाजपचे माजी आमदार होते,
कोटा श्रीनिवास हे केवळ अभिनेते नाही तर त्यांनी राजकारणातही आपले नशीब आजमावले. ते भाजपचे माजी आमदार होते. १९९० च्या दशकात भाजपमध्ये त्यांनी प्रवेश केला आणि त्यानंतर 1999 मध्ये विजयवाडा पुर्व येथून आंध्र प्रदेश विधानसभेवर निवडून आले. फिल्म येण्यापूर्वी कोटा श्रीनिवास बँकेत काम करत होते, परंतु नशिबाने त्यांना अभिनयाच्या जगात आणले.
भारतीय चित्रपटसृष्टीतील योगदानाबद्दल कोटा श्रीनिवास यांना 2015 मध्ये पद्मश्री पुरस्काराने सन्मानित करण्यात आले.
हा सिनेमा ठरला शेवटचा
कोटा श्रीनिवास यांनी शेवटचे 2023 मध्ये रिलीज झालेल्या आर. चंद्रू यांच्या ‘कबजा’ चित्रपटात काम केले होते. या चित्रपटात उपेंद्र राव, शिवा राजकुमार, किचा सुदीप, श्रिया सरन आणि मुरली शर्मा सारखे कलाकार होते. कोटा श्रीनिवास यांच्या निधनाने एका युगाचा अंत झाला आहे
