महिला प्रीमियर लीगचा (WPL 2024) तिसरा सामना मुंबई इंडियन्सन आणि गुजरात जायंट्सला (GGW vs MIW) यांच्यात खेळवला गेला. या सामन्यात हरमनप्रीत कौरच्या (Harmanpreet Kaur) नेतृत्वात मुंबईच्या पोरींनी गुजरात जायंट्सला 5 विकेट्सने धूळ चारली आहे.
मुंबईची स्टार लेग स्पिनर एमेलिया केर (Amelia Kerr) हिने सर्वाधिक 4 विकेट्स घेतल्या तर शबनिम इस्माईलने (Shabnim Ismail) 3 विकेट्स घेत गुजरातला बॅकफूटवर पाठवलं होतं. त्यामुळे गुजरातला फक्त 126 धावा करता आल्या. गुजरातने दिलेल्या 127 धावांचा मुंबईने यशस्वी पाठलाग केला अन् लीगमधील दुसरा विजय नोंदवला आहे.
गुजरातने दिलेल्या 127 धावांचं माफक आव्हान पार करण्यासाठी उतरलेल्या हेली मॅथ्यूज आणि यास्तिका भाटिया यांना मोठी खेळी करता आली नाही. दोघी प्रत्येकी 7 धावा करून बाद झाल्या. त्यानंतर नॅट सायव्हर-ब्रंट आणि हरमनप्रीत कौर यांनी सुट्टी दिली नाही अन् स्कोरबोर्ड पळवला. एका चुकीमुळे नॅटला विकेट गमवावी लागली.
त्यानंतर गोलंदाजीत धुमाकूळ गाजवणाऱ्या अमेलिया केरने फलंदाजीतील टॅलेंट दाखवलं अन् 31 धावांची मॅच विनिंग खेळी केली. अमेलिया केरने मुंबईला विजयाच्या उंभरठ्यावर आणून ठेवलं. ती बाद झाल्यानंतर कॅप्टन हरमनप्रीतने विजयी षटकार खेचत मुंबईच्या दुसऱ्या विजयाची नोंद केली.
