सध्या बारावीची व दहावीची परीक्षा चालू आहे. बारावी झाल्यानंतर नेमके कोणत्या क्षेत्रात आपण करीयर करावे याबाबत खूपच प्रश्न आपणाला उभे राहतात. बारावीनंतर आता पुढे काय? हा प्रश्न अनेक विध्यार्थी पालकासाठी उभा राहतो. कारण बारावी ही आयुष्यातील सर्वात मोठी पायरी असते आणि त्यावरच आपले भविष्य अवलंबून असते. त्यामुळे पुढे काय करायचे याबाबत व्यवस्थित विचार करूनच प्रत्येकाने निर्णय घ्यायला हवा.
परंतु बारावीनंतरच्या सुट्टीत वेळ वाया न घालवता कोणते कोर्स करून ठेवणे आपल्या फायद्याचे ठरेल? तर सुट्टीमध्ये तुम्ही नेमके कोणते कोर्सेस करावे याबाबत आपण थोडसं जाणून घेऊयात.
डिप्लोमा इन कॉम्पुटर अ‍ॅप्लिकेशन : इयत्ता बारावीनंतर नोकरी मिळवण्यासाठी अगदी एका महिन्यापासून सहा महिन्यांपर्यंत कालावधीचे अनेक कोर्स उपलब्ध आहेत. कॉम्पुटर अ‍ॅप्लिकेशन डिप्लोमा केल्यास मल्टी नॅशनल कंपनीत नोकरी मिळू शकते. या कोर्सनंतर सॉफ्टवेयर डेव्हलपर, सॉफ्टवेयर मॅनेजर आणि ग्राफिक डिझायनर होण्याची संधी मिळते.
इव्हेंट मॅनेजमेंट : आपल्याला मॅनेजमेंट विभागाची आवड असेल, तर आपण बारावीनंतर इव्हेंट मॅनेजमेंट डिप्लोमा करू शकता. त्यासाठी एका वर्षापेक्षा कमी कालावधी लागतो. या कोर्सनंतर ब्रँड मॅनेजिंग, नेटवर्किंग, होस्टिंग, बजेट मॅनेजिंग, मीडिया मॅनेजमेंट, इत्यादी क्षेत्रात आपण करियर करू शकता.
डिजिटल मार्केटिंग कोर्स : सध्या या कोर्सचा प्रचंड बोलबाला आहे. दिवसागणिक वाढणाऱ्या ऑनलाइन व्यवहारांमुळे डिजिटल मार्केटिंग एक्सपर्टची गरज निर्माण होते. हा शॉर्ट टर्म कोर्स केल्यानंतर तुम्हाला एसईओपासून वेब अ‍ॅनालिटिक्स आणि अ‍ॅफिलिएट मार्केटिंगबाबत विस्तृत माहिती मिळेल.
फोटोग्राफी कोर्स : आपल्याला फोटोग्राफीची विशेष आवड असेल, त्यातच करियर करायचं असेल तर आपण फोटोग्राफीचा सर्टिफिकेट कोर्स करू शकता. या शॉर्ट टर्म कोर्समध्ये आपल्याला कॅमेरा टेक्निक, लायटिंग आणि पोस्ट-प्रोसेसिंगबाबत विस्तृत माहिती मिळेल.
डिप्लोमा इन फॉरेन लँग्वेज : हा कोर्स केल्यानंतर आपल्याला एक उत्तम पगाराची नोकरी मिळू शकते. भाषा हा संवादातला सर्वात महत्त्वाचा घटक असतो. म्हणूनच एखादी फॉरेन लँग्वेज शिकल्यास पुढे आपण इतरांना तिचंं प्रशिक्षण देऊ शकता.
