सांगली लोकसभा मतदारसंघावरुन शिवसेना आणि काँग्रेसच्या महाविकास आघाडीमध्ये वाद वाढला आहे. शिवसेना ठाकरे गटाने सांगलीत पैलवान चंद्रहार पाटील यांची उमेदवारी जाहीर केली आहे. त्याचवेळी काँग्रेस ही जागा सोडण्यास तयार नाही. काँग्रेसच ही जागा लढवणार असल्याचे विशाल पाटील यांनी म्हटले आहे. त्यासाठी विश्वजित कदम, विशाल पाटील हे काँग्रेसचे अध्यक्ष मल्लिकार्जुन खर्गे यांची भेट घेण्यासाठी दिल्लीला गेले होते. विश्वजित कदम आणि विशाल पाटील यांनी मल्लिकार्जुन खरगे आणि के. सी. वेणुगोपाल यांची भेट घेत सांगलीच्या जागेबाबत चर्चा केली.
सांगलीच्या जागेवर अनेक वर्षांपासून काँग्रेसचे अस्तित्व आहे. त्यामुळे ही जागा सोडायला नको, अशी भूमिका विशाल पाटील यांनी वरिष्ठांकडे मांडली आहे. त्यानंतर आता विशाल पाटील यांनी सांगलीतील काँग्रेस कार्यकर्त्यांना उद्देशून पोस्ट लिहिली आहे. त्यात त्यांनी भूमिका मांडली आहे.
पोस्टमध्ये विशाल पाटील यांनी म्हटले आहे की, मागच्या काही वर्षात सांगली काँग्रेसचा अनेक आघाड्यांवर संघर्ष सुरू आहे. सांगलीकरांच्या विकासासाठी आपण सत्ताधाऱ्यांविरुद्ध सातत्याने संघर्ष करत आहेत. काँग्रेसनेच जिल्ह्यात विकासरुपी गंगेच्या माध्यमातून सांगलीचा चेहरामोहरा बदलून टाकला. त्यामुळे सांगली काँग्रेसची आणि काँग्रेस सांगलीची असं समीकरणच तयार झालं आहे.
