अयोध्येत उभारण्यात आलेल्या भव्य मंदिरात रामललाची प्रतिष्ठापना करण्याची तयारी पूर्ण झाली आहे. या अनुषंगाने चोख सुरक्षा व्यवस्था ठेवण्यात येणार आहे. येत्या २२ जानेवारीला राम मंदिराच्या उद्घाटनासाठी सुरक्षा व्यवस्था अत्यंत कडक करण्यात आली आहे. यादरम्यान, अयोध्येत बाहेरील लोकांच्या प्रवेशावर बंदी असेल. फक्त निमंत्रित व्यक्ती आणि सरकारी ड्युटीवर असलेल्या लोकांनाच अयोध्येत राहण्याच्या सूचना देण्यात आल्या आहेत. अयोध्या राम मंदिर उद्घाटन सोहळ्याच्या तयारीबाबत प्रशासकीय पातळीवर सातत्याने बैठका सुरू आहेत. राम मंदिराचे उद्घाटन हा मोठा कार्यक्रम मानला जात आहे. या कार्यक्रमात कोणतेही विघ्न येऊ नये यासाठी चोख तयारी करण्यात येत आहे.
मंदिरातील अभिषेक सोहळ्याच्या तयारीसाठी मुख्यमंत्री योगी आदित्यनाथ अयोध्येत पोहोचले आहेत. यावेळी त्यांनी तयारीचा आढावा घेतला. यावेळी त्यांनी सांगितले की २२ जानेवारीला नव्याने बांधलेल्या राम मंदिरातील अभिषेक समारंभावेळी केवळ राम मंदिर ट्रस्ट किंवा सरकारी ड्युटीचे वैध निमंत्रण असलेल्या लोकांनाच अयोध्येत प्रवेश करण्याची परवानगी दिली जाईल. गुरुवारी अयोध्येत आढावा बैठकीदरम्यान मुख्यमंत्री योगी आदित्यनाथ यांनी अयोध्येच्या स्थानिक हॉटेल मालकांना शक्य तितक्या इतर लोकांचे आगाऊ बुकिंग रद्द करण्यास सांगण्याचे निर्देश अधिकाऱ्यांना दिले. तसेच, ट्रस्टने निमंत्रित केलेल्या लोकांना प्राधान्य देण्याच्या सूचना देण्यास सांगितलं आहे.
आमंत्रित लोकांच्या राहण्यासाठी विशेष व्यवस्था करण्यात यावी. ट्रस्टने अयोध्येत यात्रेकरूंच्या मुक्कामाची व्यवस्था करावी, असे निर्देशही मुख्यमंत्री योगी आदित्यनाथ यांनी दिले. यासोबतच यात्रेकरूंना धर्मशाळा आणि हॉटेल्स आदी ठिकाणीही ठराविक दरात राहण्याची व्यवस्था करण्यात यावी, असंही त्यांनी सांगितलं. २२ जानेवारीला केवळ तेच लोक अयोध्येत येऊ शकतील, ज्यांच्याकडे निमंत्रण पत्र असेल किंवा जे सरकारी ड्युटीवर तैनात असेल.
२२ जानेवारीला अभिषेक सोहळ्याच्या दिवशी काही लोकांनी स्थानिक हॉटेल आणि धर्मशाळा बुक केल्याचे दिसून आले आहे. व्यवस्थापनाला कोणतीही अडचण येऊ नये म्हणून ती रद्द करावी, कारण त्या दिवशी संपूर्ण भारतातून विशेष निमंत्रित येणार आहेत, असंही आदित्यनाथ यांनी सांगितलं.
अधिकाऱ्यांनी अयोध्येतील विविध मुक्कामाच्या ठिकाणांना भेटी द्याव्यात. आमंत्रित पाहुण्यांच्या सहलीसाठी निवास व्यवस्था तपासावी, असेही निर्देश त्यांनी अधिकाऱ्यांना दिले. २२ जानेवारीच्या कार्यक्रमासाठी १०० विमाने अयोध्या आंतरराष्ट्रीय विमानतळावर उतरू शकतात. यासाठी त्यांनी अयोध्या प्रशासनाला वाहतूक वळवण्याचा आराखडा तयार ठेवण्याच्या सूचना दिल्या आहेत, जेणेकरून कोणताही गोंधळ होणार नाही.
