पुण्यातून (Pune) एक धक्कादायक घटना समोर आली आहे. लग्नाचे आमिष दाखवून पुण्यात राहणाऱ्या मूळ कोल्हापूरच्या तरुणाने मुंबईकर तरुणीसोबत मैत्री वाढवली. त्यानंतर तिच्याशी शरीरसंबंध ठेवले, तरी गरोदर राहिल्याने तिचा गर्भपातही घडवून आणला, मात्र काही दिवसातच त्याने तिला सोडून दिलं. धक्कादायक म्हणजे तिच्याच मैत्रिणीसोबत पळून जाऊन त्याने लग्न केल्याचा प्रकार समोर आला आहे. या घटनेने परिसरात एकच खळबळ उडाली आहे.
ओंकार उत्तम प्रधान (वय 22) असे आरोपी तरुणाचे नाव आहे. पीडित तरुणीने कोडोली पोलीस ठाण्यात धाव घेतल्यानंतर पोलिसांनी ओंकारला ताब्यात घेतले आहे.
याबाबत मिळलेली माहिती अशी की, नोकरीच्या निमित्ताने पुण्यात राहणाऱ्या एका तरुणीच्या सोबत ओंकार प्रधान या तरुणाने मैत्री केली. तिला लग्नाचे आमिष दाखवून त्याने तिच्यासोबत शारीरिक संबंध प्रस्थापित केल्याचा आरोप आहे. दरम्यान, काही दिवसानंतर ओंकारने तिला सोडून दिलं. इतकंच नाही, तर प्रेयसीच्या मैत्रिणीसोबतच तो पळून गेला आणि त्याने तिच्यासोबत लग्नही केलं. हा प्रकार समजताच तरुणीचा संताप झाला आणि तिने पोलिसात धाव घेतली.
फक्त इयत्ता बारावी शिक्षण झालेला ओंकार प्रधान हा कोल्हापूर सोडून पुण्यात (Pune) आला होता. त्याने पुण्यात येऊन एका कंपनीत जॉब देखील जॉईन केला होता. त्याने सोशल मीडियावर मुंबईतील एका तरुणीशी मैत्री केली. त्यांच्या मैत्रीचे रूपांतर प्रेमात कधी झाले समजलेच नाही. तिला समक्ष भेटून त्याने हडपसर, पन्हाळा अशा विविध ठिकाणी नेलं. तिला लग्नाचं आमिष दाखवून तिच्याशी शरीरसंबंध प्रस्थापित केले.
इतकंच नाही, लग्नापूर्वी गरोदर राहिल्याने गर्भपात देखील करण्याची वेळ आली. असा सर्व प्रकार घडल्यानंतर देखील त्याने प्रेयसीच्या मैत्रिणीसोबत सूत जुळवले. त्यानंतर काही दिवसातच त्या दोघांनी पळून जाऊन लग्न केले. हा सर्व प्रकार त्याच्या पहिल्या प्रेयसीला समजल्यानंतर तिने कोडोली पोलीस ठाण्यात धाव घेत तक्रार दाखल केली. पोलिसांनी घटनेचे गांभीर्य ओळखत ओंकारला ताब्यात घेतले असून पुढील तपास पोलिसांकडून सुरु आहे.
