वानखेडे स्टेडियमवरील तीन स्टँडना आयसीसीचे माजी अध्यक्ष शरद पवार, भारतीय संघास प्रथमच इंग्लंड आणि वेस्ट इंडीजमध्ये विजय मिळवून देणारे भारतीय संघाचे कर्णधार अजित वाडेकर, तसेच भारतीय वनडे संघाचा कर्णधार रोहित शर्मा यांचे नाव देण्याचा नामकरण सोहळा शुक्रवारी झाला. मुख्यमंत्री देवेंद्र फडणवीस यांच्या उपस्थितीत वानखेडे स्टेडियमवर हा नामकरण सोहळा पार पडला. महाराष्ट्र क्रिकेट संघटनेचे माजी अध्यक्ष अमोल काळे यांचे नाव एमसीए लाउंजला देण्यात आले.
फडणवीसांकडून कौतुकाची थाप
‘वानखेडे स्टेडियम ही खऱ्या अर्थाने क्रिकेटची पंढरी आहे. या मुंबईत एक लाख क्षमतेचे स्टेडियम असावे. मुंबई क्रिकेट संघटनेची चार वर्षात शताब्दी होत आहे, तोपर्यंत हे स्टेडियम पूर्ण व्हावे’, अशी अपेक्षा मुख्यमंत्री देवेंद्र फडणवीस यांनी व्यक्त केली. नव्या स्टेडियमच्या उभारणीसाठी साह्य करण्याची राज्य सरकारची तयारी असल्याचेही मुख्यमंत्र्यांनी फडणवीस यांनी सांगितले. काही महिन्यांपूर्वी अमोल काळे आणि अजिंक्य नाईक आले होते. त्या वेळी त्यांनी मुंबई क्रिकेट संघटनेने एक लाख क्षमतेचे स्टेडियम असावे, अशी अपेक्षा व्यक्त केली होती. तुम्ही या स्टेडियमबाबत प्रस्ताव घेऊन आलात, तर महाराष्ट्र सरकार मुंबई क्रिकेट संघटनेला त्यांच्या मालकीचे स्टेडियमसाठी जागा उपलब्ध करून देईल, याची मी ग्वाही देतो.
त्याच वेळी त्यांनी मुंबई क्रिकेट संघटना चार वर्षांनी शताब्दी होत आहे. तोपर्यंत आपले नवे स्टेडियम तयार व्हावे. या स्टेडियमच्या उभारणीसाठी मुंबई संघटनेला जी काही मदत आवश्यक असेल, ती देण्यासाठी आम्ही (राज्य सरकार) तयार आहोत, असेही ते म्हणाले. वानखेडे स्टेडियमची जागा देण्यापासून स्टेडियमच्या नूतनीकरणात माझा सहभाग आहे. आंतरराष्ट्रीय मैदान गाजवणाऱ्यांचे नाव या स्टेडियममधील स्टँडला देण्यात आले आहे. माझेही नाव स्टेडियममधील स्टँडला दिल्यामुळे माझे या स्टेडियमसह असलेले ऋणानुबंध कायम राहतील, असे पवार म्हणाले. या सोहळ्यास डायना एडल्जी, दिलीप वेंगसरकर, रवी शास्त्री आदी उपस्थित होते.
नीता अंबानी (Nita Ambani) काय म्हणाल्या ?
“अभिनंदन, रोहित! ‘वानखेडे’ त्याच्या आवडत्या लेकरांपैकी एकाचा सन्मान करत असताना, आता फक्त तुमच्या आठवणीच नाही, तर तुमचं नावही कोरलं गेलंय. प्रत्येक युवा क्रिकेटपटूसाठी तुम्ही प्रेरणेचा कायमस्वरुपी ठसा उमटवला आहे. तुम्ही आपल्या शहराचा आणि देशाचे एक खरे लेजेंड आहात” अशा भावना मुंबई इंडियन्स संघाच्या मालकीण नीता अंबानी यांनी व्यक्त केल्या आहेत.
स्टँडला नाव देण्यात आलेल्या खेळाडू, पदाधिकाऱ्यांच्या कुटुंबीयांच्या उपस्थितीमुळे वातावरण भावनिक झाले होते. वाडेकर यांचे नाव स्टँडला दिले जात असताना त्यांचे कुटुंबीय व्यासपीठावर आले होते. रोहित आपल्या नावाच्या स्टँडचे नामकरण होत असताना आईवडील आणि पत्नीला घेऊन व्यासपीठावर आला.
