इस्रायल व इराणमध्ये पाच दिवसांपासून सुरू असलेला संघर्ष अतिशय गंभीर वळणावर येऊन ठेपल्याचे दिसत आहे. इराणची राजधानी तेहरानला थेट लक्ष्य करण्याचे संकेत इस्रायलने दिले असून अमेरिकेचे अध्यक्ष डोनाल्ड ट्रम्प (Donald Trump) यांनीही यास अप्रत्यक्ष दुजोरा दिला आहे. ‘तेहरानमधील नागरिकांनी त्वरित शहर सोडावे,’ असे इशारावजा आवाहन ट्रम्प यांनी सोमवारी केले.
इस्रायलचे पंतप्रधान बेंजामिन नेतान्याहू यांनी यापूर्वी याच स्वरूपाचा इशारा दिला होता. दरम्यान, कॅनडा येथे सुरू असलेली जी ७ शिखर परिषद मध्येच सोडून ट्रम्प आपल्या सुरक्षा पथकासह मायदेशी परतले. त्यानंतर त्यांनी इराणला हा इशारा दिल्याने यातील गांभीर्य वाढले आहे. ‘इराणला अण्वस्त्रे बाळगण्याची मुभा कदापि दिली जाणार नाही,’ असेही ट्रम्प म्हणाले. ‘इराणच्या अणुऊर्जा कार्यक्रमातून तोडगा काढण्यासाठी इस्रायलने प्रयत्न केले. परंतु इराणला या चर्चेत व तोडग्यात स्वारस्य असल्याचे दिसत नाही. इराणने इस्रायलसोबत समझोता करायला हवा होता. मीही त्यांना त्याबाबत आवाहन केले होते. मात्र आता चर्चेचे दरवाजे बंद झाले आहेत, असे वाटते.
तेहरानमधील नागरिकांनी लवकरात लवकर शहर सोडायला हवे. त्यांच्या सुरक्षेसाठीच मी हे बोलत आहे,’ असे ट्रम्प म्हणाले. जी ७ शिखर परिषदेतून अचानक मायदेशी परतल्यानंतर ट्रम्प यांनी हे विधान केले. ट्रम्प यांनी सल्लागारांसोबत बैठक आयोजित केल्याने इस्रायल अमेरिकेच्या साथीने इराणवर संहारक हल्ले करण्याची शक्यता व्यक्त होत आहे. ‘या संघर्षात शस्त्रसंधी घडवून आणण्यासाठी अमेरिका प्रयत्नशील आहे व त्यासाठीच ट्रम्प मायदेशी परतले,’ असे विधान करणारे फ्रान्सचे अध्यक्ष मॅक्रॉनवर ट्रम्प यांनी टीका केली.
