विलास शिंदेंचा आज शिवसेनेत प्रवेश; ‘हे’ सहा नगरसेवकही जाणार सोबत

शिवसेना ठाकरे गटातून उचलबांगडी झाल्यानंतर माजी महानगरप्रमुख विलास शिंदे (Vilas Shinde) आज (दि. २९) शक्तिप्रदर्शन करीत उपमुख्यमंत्री एकनाथ शिंदेंच्या उपस्थितीत शिवसेना शिंदे गटात प्रवेश करणार आहेत. त्यांच्याबरोबर सहा माजी नगरसेवक, चार जिल्हापरिषद सदस्य, सहा माजी पंचायत समिती सदस्यांसह संघटनेतील अनेक पदाधिकारीही प्रवेश करणार असल्याचे त्यांनी सांगितले. त्यामुळे ठाकरेसेनेला पुन्हा मोठे खिंडार पडणार आहे.

स्थानिक स्वराज्य संस्थांच्या निवडणुकांची तयारी सुरू होताच पक्षांतराचे वारे सुरू झाले आहेत. नाशिकमध्ये ठाकरे गटातून मोठ्या प्रमाणावर आउटगोइंग सुरू आहे. गेल्या आठवड्यात खासदार संजय राऊत यांचे निकटवर्तीय असलेले पक्षाचे उपनेते सुधाकर बडगुजर यांच्या भाजपप्रवेशाचे नाट्य रंगले. ते संपत नाही तोच आता महानगरप्रमुख विलास शिंदे यांनी ठाकरेंना दुसरा झटका दिला. मुलीच्या विवाहसोहळ्यानिमित्त विलास शिंदे यांनी गेल्या काही दिवसांत उपमुख्यमंत्री एकनाथ शिंदे यांची दोन वेळा भेट घेतली होती.

गुरुवारी (दि. २६) शिंदे यांनी स्वत:च्या वाढदिवस कार्यक्रमाच्या नियोजन बैठकीचे कारण देत समर्थकांसह पक्षांतराचे संकेत दिले होते. त्यांनतर माध्यमांकडे जाहीर नाराजी व्यक्त केल्यानंतर शुक्रवारी (दि. २७) रात्री खासदार संजय राऊत यांनी शिंदेना महानगरप्रमुख पदावरून हटवत मामा राजवाडेंकडे महानगरप्रमुख सोपवले होते. त्यानंतर शिंदे समर्थकांसह आज सकाळी ११ वाजता शिवसेनेत प्रवेश करणार आहेत.

माजी नगरसेवक संतोष गायकवाड, नयना गांगुर्डे, विष्णुपंत बेंडकुळे, पल्लवी पाटील, उषा शेळके, नीलेश ठाकरे यांच्यासह चार माजी जिल्हापरिषद सदस्य, सहा पंचायत समिती सदस्य आणि ४० संरपंचासह संघटनेतील महत्त्वाचे पदाधिकारी शिवसेनेत प्रवेश करणार असल्याचा दावा शिंदे यांनी केला. ठाण्यात एकनाथ शिंदेंच्या उपस्थितीत हा प्रवेश सोहळा होणार असल्याने विलास शिंदेंकडून मोठ्या प्रमाणावर शक्तिप्रदर्शन केले जाणार आहे.