नवी मुंबईतील घणसोलीमधील (Ghansoli) ओम साईराम सोसायटी मधील एका रूमच्या किचनचा स्लॅब अचानक खाली कोसळल्याने एकच खळबळ उडाली. स्लॅब पडताना घरातील महिला किचन मध्ये होती मात्र तिच्या लक्षात येताच ती बाहेर पळाली. तरीही स्लॅबचा काही भाग तिच्या डोक्यावरून हातावर पडल्याने हाताला दुखापत झाली. मोठी दुर्घटना होता होता टळली आहे. पालिका अधिकाऱ्यांनी घटनेच्या ठिकाणी भेट देऊन पुढील उपाययोजना करण्याचे आश्वासन दिल्याचे पीडित महीलेने सांगितले.
घणसोलीतील सेक्टर 7 मधील बिल्डिंग, सिम्पलेक्स ओम साई सोसायटीतील बिल्डिंग F 3 नंबर 307 मध्ये सकाळी सकाळी घरातील सर्व मंडळी, शरद बांदल आणि पत्नी मीनाक्षी बांदल कामावर जाण्यासाठी तयारी करत असताना ही घटना घडली. कामावर जाताना चहा प्यायचा म्हणून महिला किचन मध्ये चहा करायला गेली असता अचानक स्लॅबचा काही भाग महिलेच्या डोक्यावरून हातावर पडला. स्लॅब कोसळताच तत्काळ महिला आणि इतर सदस्य घरातून बाहेर पळाले. त्यामुळे जीवितहानी टळली.
मागील दहा वर्षांपासून या ठिकाणी बांदल कुटुंबीय वास्तव्य करत असून, इमारत जुनी असल्याचे त्यांनी सांगितले. नवी मुंबई महानगर पालिकेने अशा अनेक इमारतींना धोकादायक इमारती म्हणून घोषित केल्या असून, त्या खाली करण्याच्या नोटीस दिल्या आहेत. मात्र संबधित इमारतीला नोटीस बजावण्यात आली नसल्याचे सांगितले जात आहे. मात्र तरीही अशा दुर्घटना होत असल्याने नवी मुंबईतील जुन्या झालेल्या इमारतीतील नागरिक भयभीत झाले आहेत. भर पावसात अशा घटना घडल्या तर नागरिकांनी कुठे जायचे असा प्रश्न या निमित्ताने उपस्थित होत आहे. पीडित कुटुंबीयांना पालिकेने सुरक्षित स्थळी स्थलांतर करावे अशी मागणी करण्यात आली आहे. या घटनेने नवी मुंबईतील जुन्या इमारतीच्या पुनर्बांधणीचा प्रश्न पुन्हा एकदा ऐरणीवर आला आहे.
