भारतातील वेगाने वाढणाऱ्या दागिन्यांच्या बाजारपेठेतील एक आघाडीची कंपनी आणि डिजिटल-फर्स्ट ब्रँड ब्लूस्टोन ज्वेलरी आयपीओ घेऊन येत आहे. हा आयपीओ (IPO)गुंतवणूकदारांसाठी सोमवार, ११ ऑगस्टपासून खुला होईल आणि बुधवार, १३ ऑगस्ट रोजी बंद होईल. ब्लूस्टोन ज्वेलरी आयपीओ द्वारे विस्तार योजनांना आणखी बळकटी देण्याचा विचार करत आहे.
किंमत पट्टा
Bluestone Jewellery IPO चा किंमत पट्टा ४९२ रुपये ते ५१७ रुपये प्रति शेअर असा निश्चित केला आहे. आयपीओ मध्ये ८२० कोटी रुपयांचे नवीन शेअर्स जारी केले जाणार आहेत. तर १.३९ कोटी शेअर्सची विक्री ऑफर फाॅर सेल (ओएफएस) मध्ये होईल. यामध्ये विद्यमान भागधारक त्यांचे शेअर्स विकतील. नवीन शेअर्समधून मिळणाऱ्या भांडवलाचा वापर कंपनीच्या खेळत्या भांडवलाच्या गरजा आणि इतर सामान्य कॉर्पोरेट उद्देशासाठी केला जाईल.
ब्लूस्टोन ज्वेलरी आयपीओ इतर गुंतवणूकदारांसाठी ११ ऑगस्ट ते १३ ऑगस्ट या कालावधीत खुला असेल. शेअर्सचे वाटप गुरुवार, १४ ऑगस्टला केले जाईल. डीमॅट खात्यात शेअर्स सोमवार, १८ ऑगस्टला जमा होतील. तर शेअर्सचे लिस्टिंग लिस्टिंग मंगळवार, १९ ऑगस्ट रोजी होईल.
ब्लूस्टोन ज्वेलरी अँड लाइफस्टाइल लिमिटेड हा एक डायमंड, गोल्ड, प्लॅटिनम आणि स्टडेड ज्वेलरी ब्रँड आहे ज्याने संपूर्ण भारतात आपला ठसा उमटवला आहे. कंपनीकडे ३१ मार्च २०२५ पर्यंत ११७ शहरांमध्ये २७५ स्टोअर्सचे मजबूत नेटवर्क आहे. यामध्ये २०० कंपनीच्या मालकीचे आणि ७५ फ्रँचायझी स्टोअर्स आहेत. कंपनी देशभरात १२,६०० हून अधिक पिन कोड सेवा देते. कंपनीच्या उत्पादन श्रेणीमध्ये अंगठ्या, कानातले, नेकलेस, पेंडेंट आणि चेन असे ९१ वेगवेगळे संग्रह समाविष्ट आहेत. रेड हेरिंग प्रॉस्पेक्टस (RHP) नुसार, कंपनीच्या काही सूचीबद्ध स्पर्धकांमध्ये टायटन कंपनी, कल्याण ज्वेलर्स आणि सेन्को गोल्ड सारख्या मोठ्या नावांचा समावेश आहे.
