‘ घरत गणपती ‘ या चित्रपटाने गेल्यावर्षी प्रेक्षकांच्या मनात घर केले होते. 26 जुलै 2024 रोजी रीलिज झालेल्या या सिनेमाला नुकतेच एक वर्ष पूर्ण झाले. त्यानिमित्ताने यामधील कलाकार एकत्र आले होते. ओटीटी प्लॅटफॉर्मवर या सिनेमाला चांगला प्रतिसाद मिळाला होता. आता घरत गणपती च्या चाहत्यांसाठी एक आनंदाची बातमी आहे. ऐक गणेशोत्सवात (Ganeshotsav) ‘घरत गणपती’ पुन्हा एकदा सिनेमागृहात रीलिज होणार आहे. 27 ऑगस्ट रोजी बाप्पांचे आगमन होणार असून 29 ऑगस्टपासून ‘घरत गणपती’ रीरीलिज होणार आहे.
चित्रपटाचा दिग्दर्शक नवज्योत बांदिवडेकरने याविषयी आनंद व्यक्त करत म्हटले की, ‘अनेकदा प्रेक्षक ‘घरत गणपती’ हा चित्रपट मोठ्या पडद्यावर पाहायला कधी मिळणार? असं विचारत होते. गणरायाच्या आशीर्वादाने त्यांची ही इच्छा पूर्ण करता येतेय याचा खूप आनंद आहे. हा चित्रपट मोठ्या पडद्यावर पहाण्याची एक वेगळी मजा आहे. एक छान कौटुंबिक कथा आणि भारतीय संस्कृतीचे दर्शन या चित्रपटाच्या माध्यमातून आम्ही दाखवले, त्या चित्रपटाचं आज विविध स्तरावर खूप कौतुक होताना दिसतंय. याचा खूप अभिमान वाटतो आहे.’
तर पॅनोरमा स्टुडिओजचे सीईओ मुरलीधर छतवानी यांनी असे म्हटले की, ‘चित्रपटाच्या संपूर्ण टीमने अतिशय मेहनत घेऊन हा चित्रपट निर्माण केला आणि त्याला प्रेक्षकांकडूनही जोरदार प्रतिसाद मिळाला त्यामुळे आम्ही सर्वप्रथम प्रेक्षकांचे आभार मानतो.’ पॅनोरमा स्टुडिओज आणि नॅविअन्स स्टुडिओ यांच्या विद्यमाने आलेल्या या मराठी चित्रपटाची निर्मिती कुमार मंगत पाठक, अभिषेक पाठक, नम्रता बांदिवडेकर, नवज्योत नरेंद्र बांदिवडेकर, गौरी कालेलकर-चौधरी यांनी केली होती.
बॉलिवूडची लोकप्रिय अभिनेत्री निकिता दत्ताने या सिनेमातून मराठी सिनेविश्वात पदार्पण केलेले. याशिवाय या सिनेमात भूषण प्रधान, अश्विनी भावे, अजिंक्य देव,संजय मोने, शुभांगी लाटकर, शुभांगी गोखले, डॉ.शरद भुताडिया, सुषमा देशपांडे, परी तेलंग,आशिष पाथोडे, रूपेश बने, राजसी भावे, समीर खांडेकर, दिव्यलक्ष्मी मैस्नाम अशा दिग्गज कलाकारांनी महत्त्वाची भूमिका साकारली आहे. याशिवाय या चित्रपटातील ‘गणपती आले’, ‘नवसाची गौराई माझी’, ‘माझ्या कोकणचो रुबाब भारी’ ही गाणी यंदाही गणेशोत्सावामध्ये ट्रेन्ड होत आहेत. ही गाणी आता थिएटरमध्येही अनुभवता येणार आहेत.
