तोंडात आलेले छाले दिसायला लहान वाटतात, पण त्यांचा त्रास मात्र प्रचंड मोठा असतो. खाणं, पिणं, बोलणं, अगदी हसणं देखील कठीण होतं. लहान मुलांपासून ते प्रौढांपर्यंत कुणालाही ही समस्या भेडसावू शकते. बहुतेक वेळा लोक या त्रासाला फक्त उष्णतेशी किंवा पोटाच्या बिघाडाशी जोडतात, पण खरी कारणं यापेक्षा अधिक खोलवर असतात. आपल्या शरीरात काही विशिष्ट जीवनसत्त्वांची कमतरता निर्माण झाली की तिचा पहिला इशारा तोंडातील छाल्यांमधून दिसून येतो. ही समस्या तात्पुरती असली तरी वारंवार छाले येणं हे शरीराच्या पोषणाच्या कमतरतेचं लक्षण असू शकतं.
महत्त्वाचं म्हणजे या त्रासावर फारशी औषधं आवश्यक नसतात, योग्य आहार आणि जीवनसत्त्वं यांची कमतरता भरून काढली की आराम मिळतो. आपल्याकडच्या दैनंदिन खाण्यातच काही अशा गोष्टी आहेत ज्या या त्रासावर उपाय ठरू शकतात. चला तर पाहूया कोणत्या जीवनसत्त्वांच्या कमतरतेमुळे छाले होतात आणि कोणते खाद्यपदार्थ त्यावर प्रभावी ठरतात.
दही आणि ताक
दह्यामध्ये असलेले प्रोबायोटिक्स आतड्यांतील चांगल्या जीवाणूंचं प्रमाण वाढवतात, ज्यामुळे जीवनसत्त्व बी समूहाची कमतरता कमी होते. रोज एक वाटी दही खाल्ल्याने तोंडातील जळजळ कमी होते आणि छाल्यांची तीव्रता घटते. ताक प्यायल्याने शरीराला थंडावा मिळतो आणि उष्णतेमुळे होणारे छाले कमी होतात.
पालक व हिरव्या पालेभाज्या जीवनसत्त्वांचा खजिना
आपल्या थाळीतली हिरवी भाजी ही केवळ भूक भागवण्यासाठी नसते, तर ती अनेक जीवनसत्त्वांची शिदोरी असते. पालक, मेथी, चाकवत अशा पालेभाज्यांमध्ये फोलिक अॅसिड आणि जीवनसत्त्व सी भरपूर प्रमाणात असतं. या घटकांमुळे पेशींची दुरुस्ती वेगाने होते आणि तोंडातील लहान जखमा किंवा छाले लवकर भरून येतात. पालकाचं सूप किंवा हिरवी भाजी नियमित खाल्ल्यास हा त्रास बऱ्याच प्रमाणात कमी होऊ शकतो.
पेरू आणि लिंबू रोगप्रतिकारशक्ती वाढवेल
जीवनसत्त्व सी ही जखमा भरून काढणारी आणि शरीराचं संरक्षण करणारी ढाल मानली जाते. पेरू, लिंबू, मोसंबी किंवा आंबट फळं यामध्ये हे जीवनसत्त्व मुबलक प्रमाणात असतं. नियमितपणे लिंबूपाणी पिणं किंवा कच्चा पेरू खाणं यामुळे शरीराची रोगप्रतिकारक क्षमता वाढते. यामुळे केवळ छालेच नाही तर हिरड्यांच्या सूजेसारख्या समस्याही कमी होतात.
अंडी आणि दुधातील आवश्यक जीवनसत्त्वं
अंडी व दूध हे सहज मिळणारे पण पौष्टिकतेचा उत्तम स्रोत मानले जातात. त्यामध्ये असलेलं जीवनसत्त्व बी१२ रक्तनिर्मिती सुधारतं आणि पेशींना योग्य पोषण पुरवतं. रोज एक अंडं आणि एक ग्लास दूध घेतल्यास शरीरातील कमतरता हळूहळू दूर होते. यामुळे सतत होणारे छाले थांबतात आणि शरीराला ताकद मिळते.
बादाम आणि शेंगदाणे
सुका मेवा म्हणजेच बादाम, शेंगदाणे हे केवळ स्नॅक म्हणून नाही तर आरोग्यासाठीही अत्यंत उपयुक्त आहेत. त्यामध्ये असलेलं जीवनसत्त्व बी२ पेशींना तंदुरुस्त ठेवतं आणि तोंडातील कोरडेपणा कमी करतं. मूठभर बादाम खाल्ल्याने केवळ छालेच कमी होत नाहीत तर त्वचा आणि केसांनाही चांगलं पोषण मिळतं. नियमित सेवनाने शरीराची उर्जा वाढते आणि त्रास पुन्हा पुन्हा होण्याची शक्यता कमी होते.
