जिममध्ये तासन्तास वर्कआउट करून सुद्धा हवा तसा परिणाम दिसत नाही, असं अनेकदा होतं का ? वजन कमी होणं थांबणं, स्नायूंची वाढ कमी होणं किंवा थकवा सतत जाणवणं यामागे एक मोठं कारण म्हणजे प्रोटीनची कमतरता असू शकते. प्रोटीन हे फक्त बॉडीबिल्डर्ससाठी नाही, तर प्रत्येक फिटनेस प्रेमीसाठी आवश्यक पोषकतत्व आहे. प्रोटीनमुळे सांधे व स्नायूंना बळकटी मिळते आणि वाढत्या वयातही आपण हेल्दी व मजबूत राहू शकतो.
मात्र, नेहमीच गोंधळ असतो की प्रोटीनसाठी कोणता स्रोत जास्त चांगला आहे. व्हेज की नॉनव्हेज पदार्थांमधून जास्त प्रोटीन मिळतं? सकाळच्या नाश्त्यात उकडलेलं अंडं की पनीरचे क्यूब्स खाल्ले तर प्रोटीनची गरज भरून निघते ? चला, हा गोंधळ एकदाच दूर करूया.
अंड्याला ‘सुपरफूड’ म्हटलं जातं आणि त्यामागचं कारण ठोस आहे. एका उकडलेल्या अंड्यात सुमारे ६ ग्रॅम उच्च दर्जाचं प्रोटीन असतं. अंड्यात सर्व ९ आवश्यक अमिनो अॅसिड्स असतात, जे स्नायूंची दुरुस्ती आणि वाढीसाठी महत्त्वाचे आहेत. व्हिटॅमिन D, B12, सेलेनियम, हेल्दी फॅट्स हे सर्व अंड्याच्या बलकामधून मिळतं, जे हाडं मजबूत ठेवतात आणि ऊर्जा देतात. अंड्याचं प्रोटीन सहज पचतं आणि वर्कआउटपूर्वी किंवा नंतर त्वरित ऊर्जा देतं.
पनीर हा प्रोटीन, कॅल्शियम आणि हेल्दी फॅट्सचा उत्तम संगम आहे. १०० ग्रॅम पनीरमध्ये १८ते २२ ग्रॅम प्रोटीन असतं म्हणजे अंड्याच्या तुलनेत जवळपास तीनपट ! हाडं आणि दात मजबूत ठेवण्यासाठी अत्यावश्यक असतं. यातले हेल्दी फॅट्स तुमचं पोट जास्तवेळ भरलेलं ठेवतात. ज्यामुळे ओव्हरईटिंग कमी होतं. जास्त प्रोटीनमुळे स्नायूंची वाढ वेगाने होते.
दोन्हींपैकी कोणतं निवडावं ?
वजन कमी करत असाल तर अंडी हा चांगला पर्याय आहे. कमी कॅलरी, उच्च दर्जाचं प्रोटीन आणि पटकन पचणं हे वजन कमी करण्यात मदत करतं. मसल्स वाढवायचे असतील तर पनीरमधील जास्त प्रोटीन स्नायू वाढवायला उपयुक्त ठरतात. तरीही अंडीही डाएटमध्ये ठेवा, कारण ते त्वरित ऊर्जा देतात.
शाकाहारी असल्यास
जर तुम्ही शाकाहारी आहात तर पनीर हा सर्वोत्तम सोर्स आहे. त्यातून प्रोटीन आणि कॅल्शियम दोन्ही एकत्र मिळतं. एक दिवस अंडी, दुसऱ्या दिवशी पनीर किंवा दोन्ही वेगवेगळ्या वेळी खाणं ही सगळ्यात संतुलित पद्धत आहे.
तुमच्या डाएटमध्ये पुरेसं प्रोटीन असणं हे मुख्य ध्येय ठेवा. स्त्रोत अंडं असो वा पनीर, दोन्हींचे फायदे वेगवेगळे आहेत. तुमच्या उद्दिष्टानुसार, शरीराच्या गरजेनुसार आणि आहारपद्धतीनुसार योग्य प्रमाणात त्यांचा समावेश करा.
