बॉलिवूडच्या लोकप्रिय सिने-दिग्दर्शकांमध्ये रोहित शेट्टीचा समावेश होतो. आपल्या प्रत्येक सिनेमाच्या माध्यमातून काहीतरी वेगळं करण्याचा रोहितचा प्रयत्न असतो. हिंदी सिनेसृष्टीतील यशस्वी दिग्दर्शकांमध्ये रोहित एक आहे. त्याच्या सिनेमात अॅक्शन आणि नाट्य प्रेक्षकांना पाहायला मिळतं. ‘इंडियन पोलीस फोर्स’ या सीरिजच्या माध्यमातून ओटीटी विश्व गाजवण्यास रोहित सज्ज आहे. अशातच रोहित शेट्टीच्या बहुप्रतिक्षीत ‘गोलमाल 5’ या सिनेमासंदर्भात नवी अपडेट समोर आली आहे.
रोहित शेट्टीने ‘गोलमाल 5’ या सिनेमाचा मास्टर प्लॅन बनवला आहे. पिंकव्हिलाला दिलेल्या मुलाखतीत रोहित शेट्टी म्हणाला,”गोलमाल 5 नक्कीच बनवेल. हा सिनेमा मी थोडा लवकर बनवायला हवा. येत्या दोन वर्षात ‘गोलमाल 5’ प्रेक्षकांच्या भेटीला येईल. ‘गोलमाल 5’ हा नक्कीच भव्य सिनेमा असेल”.
रोहित पुढे म्हणाला,”आजच्या काळात ‘ऑल द बेस्ट’ आणि ‘गोलमाल’ सारख्या सिनेमांची निर्मिती व्हायला हवी. अशा जॉनरचे सिनेमे पाहायला प्रेक्षकांना आवडतं. ‘गोलमाल’चा मोठा चाहतावर्ग असून या चाहत्यांसाठी मी हा सिनेमा बनवत आहे. ‘गोलमाल 5’ हा विनोदीपट असला तरी भव्यदिव्य असायला हवा”.
