लोकसभा निवडणुकीची रणधुमाळी सुरू झालीय. पहिल्या टप्प्याचे अर्ज भरले जात आहेत. 19 एप्रिलला पहिल्या टप्प्यासाठी मतदान होत आहे. सर्वच राजकीय पक्षांच्या याद्या जाहीर होत आहेत. तोफा धडाडत आहेत. पण अशामध्ये मनसे कुठे आहे? मनसे अध्यक्ष राज ठाकरे कुठे आहेत? राज ठाकरे आपले पत्ते का खोलत नाहीत? मध्यंतरी राज ठाकरे दिल्लीत जाऊन भाजप नेते अमित शाह यांना भेटले. त्यांच्याशी चर्चा झाली.
नंतर मुंबईत मुख्यमंत्री आणि उपमुख्यमंत्र्यांशी राज यांची चर्चा झाली. त्यानंतर राज ठाकरे पुन्हा राजकीय चर्चांमध्ये दिसले नाहीत. त्यामुळे राज ठाकरे यांच्याबद्दलचा सस्पेन्स वाढलेला असतानाच मनसेचा गुढी पाडव्याचा टीझर लॉन्च झाला आहे. त्यातून एक सूचक विधान करण्यात आलं आहे. त्यामुळे राज ठाकरे यांच्या भाषणाची सर्वांना उत्सुकता लागली आहे.येत्या 9 एप्रिल रोजी मराठी नववर्ष दिन म्हणजे गुढी पाडवा आहे. संध्याकाळी 4 वाजता दादरच्या शिवाजी पार्कवर मनसेने गुढी पाडव्याचं आयोजन केलं आहे.
लोकसभा निवडणुकीच्या पार्श्वभूमीवर होणाऱ्या या गुढी पाडवा मेळाव्यात राज ठाकरे काय बोलतात याकडे सर्वांचं लक्ष लागलं आहे. या निमित्ताने राज ठाकरे शक्तीप्रदर्शनही करणार आहेत.सर्वच राजकीय पक्षांनी आपले उमेदवार जाहीर केले आहेत. मात्र, राज ठाकरे यांनी उमेदवार जाहीर केलेले नाहीत. तसेच कार्यकर्त्यांकडूनही मतदारसंघात काम सुरू असल्याचं चित्र दिसत नाही. त्यामुळे राज ठाकरे यांचा मनसे लोकसभा निवडणूक लढणार की नाही? याबाबत राजकीय वर्तुळात उलटसुलट चर्चा आहे. त्याबाबतही राज ठाकरे या मेळाव्यातून मोठी घोषणा करणार असल्याचं सांगितलं जात आहे.
त्यानंतर मनसेचं लोकसभेबाबतचं राज्यातील चित्र स्पष्ट होणार आहे. मनसे मैदानात उतरणार की भाजपला पाठिंबा देणार हेही याच दिवशी स्पष्ट होणार असल्याचं सांगितलं जात आहे. मनसेने गुढी पाडवा मेळाव्याचा टीझर लॉन्च केला आहे. त्यात राज ठाकरे यांचे भाषण करतानाचे व्हिज्युअल्स दाखवण्यात आले आहेत. तसेच मनसेच्या जुन्या गुढी पाडवा मेळाव्याची शिवाजी पार्कवरील गर्दीही यात दाखवण्यात आली आहे. राजकारणाची झाली दशा, राजविचार दाखवणार महाराष्ट्राला दिशा, असं या टीझरमध्ये म्हटलं आहे. तसेच महाराष्ट्रालाच नव्हे तर राजकारणालाही नवनिर्माणाची गरज असल्याचंही या टीझरमध्ये म्हटलं आहे. तसेच, महाराष्ट्र नवनिर्माण सेनेचा विजय असो, राज साहेब ठाकरे यांचा विजय असो या घोषणाही या टीझरमध्ये ऐकायला येत आहेत.
