मुंबई इंडियन्सला पराभूत करून चेन्नई सुपर किंग्जने लखनौ गाठले. शुक्रवारी ऋतुराज गायकवाडच्या नेतृत्वातील चेन्नई आणि लखनौ सुपर जायंट्स यांच्यात सामना होत आहे. लखनौचा संघ आपल्या घरच्या मैदानावर चेन्नईचा सामना करणार आहे.या लढतीत लखनौसमोर चेन्नईच्या गोलंदाजांचे कडवे आव्हान असणार आहे. इकाना स्टेडियमच्या खेळपट्टीवर चेन्नईचे गोलंदाज वर्चस्व गाजवू शकतात.
ऋतुराज गायकवाडच्या नेतृत्वाखाली आणि महेंद्रसिंह धोनीकडून प्रेरणा घेतलेला चेन्नईचा संघ मागील दोन लढतींमध्ये विजयी ठरला आहे. तर के. एल. राहुलच्या लखनौ संघाला सलग दोन पराभवांचा सामना करावा लागला आहे. लखनौचे फलंदाज अपेक्षेनुसार कामगिरी करू शकलेले नाहीत. फाॅर्मात असलेल्या चेन्नईच्या गोलंदाजांचा सामना ते कसे करतात हे पाहणे उत्सुकतेचे आहे. चेन्नईसाठी गेल्या सामन्यात मथिशा पाथीरानाने शानदार गोलंदाजी केली. त्याच्या गोलंदाजीचा लखनौच्या फलंदाजांना तोड शोधावा लागेल.
