विश्वविजेत्या भारतीय संघाला बक्षीस म्हणून भारतीय क्रिकेट नियामक मंडळाने (BCCI) १२५ कोटी रूपये देण्याची घोषणा केली. रोहित शर्माच्या नेतृत्वातील टीम इंडियाने वेस्ट इंडिजच्या धरतीवर ऐतिहासिक कामगिरी करताना ट्वेंटी-२० विश्वचषक उंचावला. बीसीसीआयने बक्षीस म्हणून दिलेली रक्कम खेळाडूंसह सपोर्ट स्टाफला दिली जाईल.
याशिवाय राखीव खेळाडूंना देखील याचा लाभ होईल. तसेच विश्वचषकाच्या संघाचा भाग असलेल्या पण प्लेइंग इलेव्हनमध्ये संधी न मिळालेल्या यशस्वी जैस्वाल, युझवेंद्र चहल आणि संजू सॅमसन यांनाही बक्षिसातील रक्कम दिली जाईल. त्यांना इतर खेळाडूंप्रमाणे प्रत्येकी ५ कोटी रूपये मिळणार असल्याचे कळते.
भारतीय संघाचे मावळते प्रशिक्षक राहुल द्रविड यांना १२५ कोटी रूपयांच्या बक्षिसापैकी ५ कोटी रूपये दिले जातील. याशिवाय कोचिंग स्टाफचे सदस्य असलेले विक्रम राठोड, टी दिलीप आणि प्रसाद म्हांब्रे यांना प्रत्येकी २.५ कोटी रूपये बक्षीस म्हणून दिले जातील.
बक्षिसाच्या एकूण रकमेपैकी २ कोटी रुपयांची बक्षीस रक्कम बॅकरूम कर्मचाऱ्यांना देखील दिली जाईल, ज्यात तीन फिजिओथेरपिस्ट, तीन थ्रोडाउन स्पेशालिस्ट, दोन मालिश करणारे आणि कंडिशनिंग प्रशिक्षक सोहम देसाई यांचा समावेश आहे.
ट्वेंटी-२० विश्वचषकात राखीव खेळाडू म्हणून भारतीय संघाचा हिस्सा असलेले रिंकू सिंग, शुबमन गिल, आवेश खान आणि खलील अहमद यांना प्रत्येकी १ कोटी रूपये मिळतील. यासह अजित आगरकर यांच्या नेतृत्वातील निवड समितील सदस्यांना देखील प्रत्येकी १-१ कोटी दिले जातील.
कोणाला किती रूपये मिळणार?
प्रत्येकी ५ कोटी – १५ खेळाडू आणि प्रशिक्षक राहुल द्रविड
प्रत्येकी २.५ कोटी – प्रशिक्षक (फलंदाजी, क्षेत्ररक्षण आणि गोलंदाजी)
प्रत्येकी २ कोटी – फिजिओथेरपिस्ट, थ्रोडाउन स्पेशालिस्ट, मालिश करणारे आणि कंडिशनिंग
प्रत्येकी १ कोटी – निवडकर्ते आणि राखीव खेळाडू
