सध्या आगामी विधानसभा निवडणुका काही महिन्यांवरच येऊन ठेपलेल्या आहेत. विधानसभा निवडणुकीची रणधुमाळी आता लवकरच सुरू होणार असल्यामुळे ज्या त्या पक्षांची आपापली मोर्चेबांधणी सुरू झालेली आहे. तसेच कोणत्या मतदारसंघांमध्ये कोणाला उमेदवारी मिळणार याकडे सर्वच कार्यकर्त्यांचे लक्ष लागून राहिलेले आहे.
सांगोला विधानसभा मतदारसंघांमध्ये विद्यमान आमदार शहाजीबापू पाटील यांनी विकासाच्या जोरावर निवडणुकीमध्ये रणशिंग फुंकलेले आहे. तर राज्यातील महायुतीचे घटक पक्षाचे दुसरे नेते माजी आमदार दीपकआबा साळुंखे पाटील संपूर्ण मतदारसंघ पिंजून काढत आहेत.
तर दिवंगत आमदार गणपतराव देशमुख यांचे दोन्ही नातू डॉ. अनिकेत देशमुख व डॉ. बाबासाहेब देशमुख या दोन नेत्यांत उमेदवारीवरून अजूनही एकमत न झाल्याने शेकाप कार्यकर्त्यांची घालमेल वाढलेली पाहायला मिळत आहे. अशातच दोन बंधूंमधील भांडणात तिसऱ्याचा लाभ होतो की काय अशा विवंचनेत शेकाप कार्यकर्ते असल्याचे दिसून येत आहेत.