गेली 60 वर्ष शेकापचा बालेकिल्ला अशी ओळख असणाऱ्या सांगोला विधानसभा मतदारसंघावर यावेळी महाविकास आघाडीमधून ठाकरे गटाने दावा सांगितलाय. त्यामुळं आघाडीत बिघाडी होण्याची शक्यता आहे. आघाडीत ही जागा शेकापला न मिळाल्यास आम्ही लाला बावटा फडकवणार असल्याची माहिती डॉ. अनिकेत देशमुख यांनी दिली आहे.महाविकास आघाडीकडून जागा वाटपात शिवसेना ठाकरे गटाने बार्शी सोबत सांगोल्याची जागाही मागितली आहे. गेल्यावेळी शिवसेनेचा आमदार असल्याने या जागेवर आमचा हक्क असल्याचा दावा ठाकरे गटाकडून करण्यात आला आहे. यामुळं महाविकास आघाडीला कायम साथ देणाऱ्या शेतकरी कामगार पक्षाची जागा धोक्यात आल्याने कार्यकर्ते संतप्त झाले आहेत. यातूनच आज डॉक्टर अनिकेत देशमुख यांनी आपली भूमिका मांडताना सांगोला विधानसभा हा पहिल्यापासून शेकापचा बालेकिल्ला असल्याने महाविकास आघाडीतून ही जागा आम्हाला नक्की मिळेल असे सांगितले. मात्र जागा वाटपात काही फेरबदल झाल्यास मात्र शेकाप कार्यकर्ते शांत बसणार नसून तसेच झाल्यास शेकाप निवडणूक लढवणार असे संकेत त्यांनी दिले आहेत.
