शिवसेनेच्या माजी आमदारांनी विरोधात लढण्याची भूमिका घेतली तरी निष्ठावंत शिवसैनिक माझ्यासोबत आहेत. लोकसभा निवडणुकीत याचा प्रत्यय आला आहे. त्यामुळे कोण विरोधात लढत असेल तर त्याचा काही उपयोग होणार नाही. पाच वर्षांत मतदारसंघाच्या विकासासाठी अनेक कामे केली आहेत. यावेळी जनता मलाच विजयी करेल, असा विश्‍वास काँग्रेसचे उमेदवार आमदार राजू आवळे यांनी व्यक्त केला.
हातकणंगले मतदारसंघात नेहमीच तिरंगी वा चौरंगी निवडणूक होते. यावेळीही १६ उमेदवार आहेत. मी समोर उमेदवार कोण आहेत यापेक्षा मी केलेल्या कामाच्या मुद्द्यावर जनतेशी पुन्हा संधी मागत आहे. जनता माझ्या कामाची व पाच वर्षांत सर्वांना सोबत घेऊन चालण्याचा जो प्रयत्न केला आहे त्याची दखल घेत मला मताधिक्य देईल.
