पंढरपूर येथील नगरपरिषदेचे बंद अवस्थेत असलेले हॉस्पिटल पुन्हा सुरू

पंढरपूर शहरामध्ये सरकारी रुग्णालय म्हणून शहराच्या जुनी पेठ भागांमध्ये अनेक वर्षापासून हॉस्पिटल बंद अवस्थेत होते. यामुळे या भागातील नागरिकांना तसेच जुन्या पंढरपुरातील नागरिकांना उपचारासाठी शहराच्या विविध भागात असलेल्या रुग्णालयात उपचारासाठी जावे लागत होते. आमदार अभिजीत पाटील यांच्या अध्यक्षतेखाली नुकत्याच पार पडलेल्या आमसभेत पंढरपूर शहरातील नागरिकांनी नगरपालिकेचे हॉस्पिटल बंद असल्याच्या तक्रार केल्याने आमदार अभिजीत पाटील यांच्या माध्यमातून त्याचा पाठपुरावा करून नगरपालिकेचे हॉस्पिटल गुढीपाडव्याच्या मुहूर्तावर सुरू करण्यात आले.

माढ्याचे आमदार व पंढरपूरचे सुपुत्र आमदार अभिजीत पाटील यांच्या हस्ते हॉस्पिटल सुरू करण्यात आले. नागरिकांच्या सेवेसाठी सुरू करण्यात आलेल्या या हॉस्पिटलचा शुभारंभ प्रसंगी माजी नगराध्यक्ष सुभाष भोसले, रा.पा कटेकर, किरणराज घाडगे, विक्रम शिरसट, नागेश जाधव यांच्यासह आरोग्य विभागाचे डॉक्टर, कर्मचारी उपस्थित होते. यातूनच हजारो गरजू रुग्णांना माफक दरात आरोग्यसेवा मिळणार आहे. सामान्य नागरिकांच्या सेवेसाठी हॉस्पिटल सुरू झाल्याने पंढरपूर शहर व परिसरात आनंदाचे वातावरण झाले आहे.