गेली सात महिन्यांपासून पंढरपूर शहरामध्ये नगरपरिषद हद्दीत विविध ठिकाणी डि. पी. रोडची कामे चालू आहेत. यामध्ये काही रस्ते खोदून ठेवले आहेत. तर काही अर्धवट अवस्थेत आहेत. त्यापैकी सांगोला रोडला जोडला जाणार रेल्वे स्थानक, बस स्थानक, शासकीय विश्राम ग्रहाकडे जाणारा महत्त्वाचा असलेला कोकाटे प्राईड ते सांगोला रोड हा डि. पी. रोड शासकीय मोजणी करून नियमाप्रमाणे रस्त्याची रुंदी कमी न करता १५ मीटर रुंदीचा व ११०० मीटर लांबीचा रस्ता तात्काळ पूर्ण करण्यात यावा.
या मागणीसाठी पंढरपूर राष्ट्रवादी काँग्रेस पक्षाचे शहराध्यक्ष दिगंबर सुडके यांनी सोलापूर जिल्ह्याचे जिल्हाधिकारी यांच्याकडे दाद मागणार असल्याचे सांगितले आहे. देण्यात येणाऱ्या निवेदनामध्ये कोकाटे प्राईड ते सांगोला रोड हा शहरातून बाहेर वाहतूक काढण्यासाठी महत्त्वाचा डि. पी. रोड १५ मी रुंदीचा व ११०० मीटर लांबीचा असताना सदरच्या रस्त्याचे काम प्रत्यक्षरीत्या मार्गावर प्रवेश करताना कोकाटे प्राईडकडून सुमारे ३०० मीटर अंतरापर्यंत १५ असताना १२ मीटर रस्त्याची रुंदी करण्यात आल्याने पुढील काळात एसटी बस व इतर वाहनांमुळे या मार्गावरील होणारी वाहतूक कोंडी टाळण्यासाठी सदरचा रस्ता नकाशा प्रमाणे सुरुवातीपासून शेवटपर्यंत १५ मीटर रुंदीचा करावा. डीपी रस्त्याच्या मोजमापात तफावत असल्याचा संशय व्यक्त करण्यात आला आहे.
रस्त्याच्या कामासाठी शासकीय मोजणी केली गेली नसल्यामुळे रस्त्यामध्ये बाधित झालेल्या जमीन मालकांना कोणत्याही प्रकारचा मोबदला दिला गेला नाही. त्यामुळे बाधित जागा मालकाचे दुहेरी नुकसान होत आहे. पंढरपुरात सुरू असलेल्या सर्व कामाबाबात संबंधित अधिकाऱ्यांवर जबाबदारी निश्चीत करावी व सुरुवातीला ३ मिटर रस्ता रुंदी कमी केली आहे. ती नकाशा प्रमाणे १५ मीटर रुंदी करून पुर्ण करावा. संबंधित ठेकेदारांवर कारवाई करण्यात यावी अशी मागणी सुडके यांनी जिल्हा प्रशासनाकडे केली आहे.
