दुष्काळ, अवकाळी आणि शेतमालांचे गडगडलेले दर या संकटांमुळे बळिराजा हतबल झाला आहे. अशा चिंताजनक परिस्थितीत राज्यातील दुष्काळ जाहीर झालेल्या ४० तालुक्यांमधील अंदाजे ४२ लाख शेतकऱ्यांना काहीच मदत मिळालेली नाही.दुसरीकडे पाच लाखांवर शेतकऱ्यांना पीकविम्याचा २५ टक्के अग्रिमही तर अवकाळीने बाधित झालेल्या अंदाजे साडेसात लाख शेतकऱ्यांना नुकसान भरपाई देखील मिळालेली नाही.पावसाळ्यात सोलापूर जिल्ह्यासह राज्यातील ४० तालुक्यांमध्ये सरासरीच्या तुलनेत ५० टक्के सुद्धा पाऊस झाला नाही.
केंद्र सरकारच्या निकषांनुसार झालेल्या सॅटेलाईट सर्व्हेत सोलापूर जिल्ह्यातील सांगोला, माढा, माळशिरस, करमाळा व बार्शी या पाच तालुक्यांसह ४० तालुक्यांमध्ये दुष्काळ जाहीर झाला. केंद्रीय पथकाने पाहणी देखील केली. मात्र, एकाही शेतकऱ्याला दुष्काळाची मदत मिळालेली नाही. तत्पूर्वी, सोलापूरसह राज्यातील १९ जिल्ह्यांमध्ये अवकाळीचा तडाखा बसला. त्यात पाच लाख हेक्टरवरील पिकांचे मोठे नुकसान झाले.सोलापूर जिल्ह्यातील ४९ हजार शेतकऱ्यांसाठी ५९ कोटी १५ लाखांची मदत मिळावी, असा प्रस्ताव जिल्हाधिकारी कार्यालयाने राज्य सरकारला सादर केला.
पण, अजूनही राज्यातील कोणालाच अवकाळीची भरपाई मिळालेली नाही. पीकविम्यापोटी दुष्काळाने बाधित शेतकऱ्यांना २५ टक्के अग्रिम मिळावा, अशी अधिसूचना जिल्हाधिकाऱ्यांनी काढून तीन महिने झाले. तरीदेखील, सोलापूर जिल्ह्यातील ६८ हजार शेतकरी मदतीच्या प्रतीक्षेतच असल्याचे कृषी विभागातील वरिष्ठ अधिकाऱ्यांनी सांगितले.
शेतकरी संघटनेच्या पदाधिकाऱ्यांनी यासंदर्भात राज्य सरकारला निवेदन दिले आहे. त्यांनी तातडीने शेतकऱ्यांना मदत मिळवून देण्याची मागणी केली आहे.दुष्काळ, अवकाळी आणि नुकसान भरपाई न मिळाल्याने शेतकऱ्यांची अवस्था वाईट झाली आहे. शेती करून कुटुंबाचा उदरनिर्वाह करणे कठीण झाले आहे. शेतकऱ्यांना कर्ज काढून शेती करावी लागत आहे.
कर्जाचा बोजा वाढत असल्याने शेतकऱ्यांना आत्महत्या करण्याची वेळ येत आहे.राज्य सरकारने शेतकऱ्यांच्या प्रश्नांकडे गांभीर्याने लक्ष दिले पाहिजे. दुष्काळ आणि अवकाळीने बाधित शेतकऱ्यांना तातडीने मदत मिळवून देणे आवश्यक आहे. पीकविम्याचा २५ टक्के अग्रिम लवकरच शेतकऱ्यांना मिळावा याची व्यवस्था राज्य सरकारने करणे आवश्यक आहे.
