राज्यातील भौतिकोपचार आणि व्यवसायोपचार पदव्युत्तर पदवी; तसेच बी. एस्सी. नर्सिंगच्या विद्यार्थ्यांच्या आंतरवासिता (इंटर्नशिप) कालावधीतील विद्यावेतनात वाढ होणार आहे. त्यामुळे शिक्षणानंतर इंटर्नशिप करणाऱ्या विद्यार्थ्यांना मोठा दिलासा मिळाला आहे.
राज्यातील शासकीय भौतिकोपचार (बीपीटी), व्यवसायोपचार (बीओटी) पदवी अभ्याक्रमाच्या विद्यार्थ्यांना पदवी अभ्यासक्रम पूर्ण केल्यानंतर २६ आठवड्यांचे (इंटर्नशिप) प्रशिक्षण पूर्ण करणे गरजेचे असते. या भौतिकोपचार व व्यवसायोपचार पदव्युत्तर पदवी अभ्यासक्रमाचे विद्यार्थी इतर विद्याशाखांच्या विद्यार्थ्यांप्रमाणे रुग्णालयातील बाह्यरुग्ण विभाग आणि आंतररुग्ण विभागात सेवा देतात. त्याचप्रमाणे बी. एस्सी. नर्सिंग पदवी अभ्यासक्रमाचे विद्यार्थी आणि भौतिकोपचार (एमपीटी) आणि व्यवसायोपचार (एमओटी) पदव्युत्तर पदवी अभ्यासक्रमाचे विद्यार्थी इंटर्नशिप कालावधीत रुग्णालयामध्ये अपघात विभाग, रेडिऑलॉजी, ओपीडी, प्रयोगशाळा, कार्डिओलॉजी, न्यूरोलॉजी विभागात सेवा देतात.
राज्यातील सरकारी भौतिकोपचार आणि व्यवसायोपचार पदव्युतर पदवी अभ्यासक्रमाच्या विद्यार्थ्यांना आंतरावासिता कालावधीत मिळणाऱ्या विद्यावेतनात वाढ करण्याची गरज निर्माण झाली होती. गेल्या २३ वर्षांपासून या विद्यार्थ्यांच्या विद्यावेतनात वाढ करण्यात आलेली नव्हती. (फिजिओथेरपी) भौतिकोपचार आणि व्यवसायोपचार (ऑक्युपेशनल थेरपी) यांच्या विद्यावेतनात एक जून २०२५ पासून १० हजार रुपये इतकी वाढ करण्यात आली आहे. मूळ वेतन व महागाई भत्ता व झालेली वाढ मिळून आता हे विद्यावेतन दरमहा ३३ हजार ७३० रुपये असेल. यासाठीच्या ६७लाख २० हजार रुपयांच्या आर्थिक तरतुदीलाही मंगळवारी झालेल्या मंत्रिमंडळ बैठकीत मान्यता देण्यात आली आहे.
बी. एस्सी. नर्सिंगच्या (B. Sc. Nursing) पदवी अभ्यासक्रमाच्या विद्यार्थ्यांनाही एक जून २०२५ पासून विद्यावेतनात आठ हजार रुपये वाढ देण्याचा निर्णय ही घेण्यात आला आहे. यासाठीच्या एक कोटी २० लाख रुपयांच्या आर्थिक तरतुदीलाही मान्यता देण्यात आली आहे. राज्यातील वाढती रुग्णसंख्या लक्षात घेता एमपीटी, एमओटी आणि बी. एस्सी. नर्सिंगच्या विद्यार्थ्यांची संख्या वाढणे व त्यांची सेवा अधिकाधिक उपलब्ध करुन घेण्याची गरज असल्याने हा निर्णय घेत आल्याची माहिती सरकारने दिली.
