शिंदेसेनेचे आणखी एक नेते अडचणीत आलेले आहेत. गृहराज्यमंत्री योगेश कदम यांच्या मातोश्रींच्या नावे असलेल्या बारवर पोलिसांनी कारवाई केल्याची माहिती शिवसेना उबाठाचे आमदार अनिल परब यांनी विधान परिषदेत दिली. बारमध्ये अश्लील नृत्य सुरु असल्यानं पोलिसांनी कारवाई केली. कदम यांच्या खात्याशी संबंधित असलेला व्यवसाय त्यांच्या मातोश्रीवर करत आहेत. त्यांच्या बारवर कारवाई झालेली आहे, असा सनसनाटी दावा परब यांनी केला. आता या प्रकरणातील एफआयआर समोर आलेला आहे.
३० मेच्या रात्री मुंबईच्या पश्चिम उपनगरातील कांदिवलीत असलेल्या सावली बारवर छापा पडला होता. रात्री पावणे अकराच्या सुमारास सुरु झालेली कारवाई पहाटे चारपर्यंत चालली. पोलिसांनी बारवर छापा टाकून २२ बारबाला, २५ ग्राहक, वेटर, कॅशियर, मॅनेजरला अटक केली. पोलिसांनी मॅनेजरचा जबाब नोंदवला. त्यात त्यानं बारचा परवाना ज्योती रामदास कदम यांच्या नावे असल्याचं सांगितलं. ज्योती कदम या गृहराज्यमंत्री योगेश कदम यांच्या मातोश्री आहेत. त्या माजी मंत्री रामदास कदम यांच्या पत्नी आहेत. बारचा परवाना ज्योती यांच्या नावानं असल्याची कबुलीही रामदास कदम यांनी दिलेली आहे.
समता नगर पोलिसांनी ३० मेच्या रात्री सावली बारवर धाड टाकली. तेव्हा तिथे २२ बारबाला आणि २५ ग्राहक होते. अश्लील नृत्य सुरु असल्यानं पोलिसांनी सगळ्यांना ताब्यात घेतलं. पहाटे चारपर्यंत पोलिसांची कारवाई चालली. पोलिसांच्या एफआयआरनुसार बारच्या मॅनेजरनं बारचा परवाना ज्योती कदम यांच्या नावे असल्याची माहिती दिली. गृहमंत्र्यांच्याच आईच्या नावे बार असल्याची आणि त्यावर छापाही पडल्याची माहिती समोर आल्यानं हितसंबंधांचा विषय उपस्थित झाला आहे.
३० मेच्या रात्री सावली बारवर छापा पडला. त्यानंतर ३१ मेपासून बार बंद आहे. बारबाहेर असलेला नामफलक झाकून ठेवण्यात आला आहे. योगेश कदम यांच्यावर थेट आरोप झाल्यानं शिंदेसेनेची गोची झाली आहे. विधिमंडळाच्या पावसाळी अधिवेशनात सेनेचे अनेक मंत्री अडचणीत आले आहेत. मंत्री संजय शिरसाट, संदिपान भुमरे यांच्यापाठोपाठ आता योगेश कदम यांच्यावर आरोप झाले आहेत.
योगेश कदम यांचे वडील आणि शिवसेना नेते रामदास कदम यांनी आमदार अनिल परब यांचे आरोप फेटाळून लावले आहेत. ‘अनिल परब अर्धवट वकील आहेत. त्यांच्यासारख्या लोकांच्या सल्ल्यांमुळेच उद्धव ठाकरेंची अवस्था आज बिकट आहे. सावली बारचा परवाना माझ्या पत्नीच्या नावावर आहे. पण तो बार गेल्या ३० वर्षांपासून शेट्टी नावाचा इसम चालवतो. आमच्याकडे ऑर्केस्ट्राचं आणि वेटरचं लायसन्स आहे. तिथे अश्लील डान्स चालत नाही,’ असं कदम म्हणाले.
