बॉलिवूडचे प्रसिद्ध चित्रपट निर्माते चंद्र बरोट (Chandra Barot) यांचे निधन झाले आहे. अमिताभ बच्चन यांच्या ‘डॉन’ या मूळ चित्रपटाचे दिग्दर्शन त्यांनीच केले होते. चंद्रा यांनी वयाच्या 86 व्या वर्षी मुंबईतील रुग्णालयात अखेरचा श्वास घेतला. त्यांच्या निधनाबाबतची माहिती त्यांची पत्नी दीपा बारोट यांनी टाइम्स ऑफ इंडियालादिली आहे. त्यांनी सांगितले की दिग्दर्शक गेली सात वर्षे फुफ्फुसांच्या फायब्रोसिस या आजाराने ग्रस्त होते. चंद्रा बारोट यांच्या निधनाची बातमी ‘डॉन 3’ चित्रपटाचे दिग्दर्शक-अभिनेता फरहान अख्तर यांनी इंस्टाग्रामवर शेअर केली आहे आणि त्यांच्या निधनाबाबत शोक व्यक्त केला आहे.
दिग्दर्शक चंद्र बरोट फुफ्फुसांच्या आजाराने ग्रस्त होते आणि या आजारात त्यांना 6 ते 7 वर्षे काढली. फरहान अख्तर याने दिग्दर्शकाच्या निधनाबद्दल शोक व्यक्त केला आणि लिहिले की, ‘ओजी डॉन दिग्दर्शकाच्या निधनाची बातमी ऐकून दुःख झाले. चंद्रा बारोट जी, तुमच्या आत्म्याला शांती लाभो. कुटुंबाप्रती माझ्या मनापासून संवेदना.’
चित्रपट दिग्दर्शक चंद्र बरोट यांनी अमिताभ बच्चन यांना घेऊन 25 लाख रुपयांच्या बजेटमध्ये ‘डॉन’हा क्लासिक कल्ट चित्रपट बनवला होता. पण हा सिनेमा बनवण्यामागेही एक खास कारण होते. ‘रेडिफ’ला दिलेल्या मुलाखतीत खूप पूर्वी त्यांनी सांगितले होते की या चित्रपटाचे निर्माते नरीमन इराणी यांना आर्थिक संकटातून बाहेर काढण्यासाठी सर्वांनी मिळून ‘डॉन’ बनवला होता. त्यांचा पहिला चित्रपट फ्लॉप झाला आणि नरीमन कर्जात बुडाले. त्यानंतर अमिताभ बच्चन, प्राण, सलीम-जावेद आणि झीनत अमान यांनी चित्रपट बनवण्यासाठी पुढाकार घेतला.
‘डॉन’ नंतर चंद्र बरोट यांनी ‘अश्रिता’ (1989) आणि ‘प्यार भरा दिल’ (1991) या बंगाली चित्रपटांचे दिग्दर्शन केले. याशिवाय त्यांनी ‘बॉस’ आणि ‘नील को पकडना इम्पॉसिबल’ सारखे चित्रपटही बनवले पण ते प्रदर्शित होऊ शकले नाहीत, ते तसेच रखडले. चंद्रा बरोट यांच्या जाण्याने इंडस्ट्रीत मोठी पोकळी निर्माण झाली आहे.
डॉन 3 हा सिनेमा लवकरच प्रेक्षकांच्या भेटीला येतोय. या सिनेमात यावेळी अभिनेता रणवीर सिंहची वर्णी लागलीय. तर कियारा अडवाणीची जागा अभिनेत्री क्रिती सेनॉन घेणार असल्याचे म्हटले जात आहे.
