श्रावण महिन्याची सुरुवात होताच सण आणि उत्सवांची रेलचेल सुरू होते. पहिला श्रावणी सोमवार, नागपंचमी, मंगळागौर, रक्षाबंधन या सणांसाठी आतापासूनच बाजार सजू लागले आहेत. या काळात देवाची पूजा, घरसजावट आणि इतर कारणांसाठी फुलांना देखील मोठी मागणी असते. त्यामुळे फुलांच्या बाजारात देखील मोठ्या हालचाली जाणवण्याची चिन्हे आहेत.
श्रावण महिन्यात वेगवेगळ्या फुलांना मोठी मागणी असते. झेंडू, गुलाब, शेवंती ही फुले तर तेजीत असतात. त्यामुळे फूलबाजारात (Flower Market) मोठी उलाढाल होत असते. या काळात सर्वच फुलांच्या दरात 30 ते 40 टक्क्यांनी दरवाढ होते, असे पुण्यातील फूल व्यापारी शशिकांत सुकरे यांनी सांगितलं.
सध्या फूल बाजारात झेंडू 80 ते 100 रुपये प्रति किलो, गुलाब 150 ते 200 रुपये एक बुके, मोगरा 500 ते 600 प्रति किलो, रजनीगंधा 200 ते 300 प्रति किलो आणि चाफा, शेवंती 140 ते 180 रुपये प्रतिकिलो या दराने विकले जातात.
श्रावण महिना म्हणजे भक्ती, सजावट आणि उत्सवांचा महिना आहे. या महिन्यात केवळ पूजाच नाही, तर अनेक ठिकाणी व्रत-वैकल्ये, गोडधोड, हळदीकुंकू अशा परंपरा असतात. या सगळ्यामध्ये फुलं नेहमीच महत्त्वाची असतात. देवाच्या पूजेसाठी वापरली जाणारी फुलं श्रद्धेचं प्रतीक मानली जातात. त्यामुळे येत्या 25 जुलैपासून सुरू होणाऱ्या श्रावण महिन्यात फुलांचे भाव वाढण्याची शक्यता वर्तवली जात आहे.
