मल्टिप्लेक्समध्ये मराठीऐवजी हिंदी चित्रपटांच्या खेळासाठी स्क्रीन दिल्या जात असल्याच्या तक्रारी नव्या नाहीत. आता सैयारा सिनेमासाठी ये रे येरे पैसा ३ या मराठी सिनेमाचे शो रद्द करण्यात आले आहेत. याच मुद्द्यावरून राजकारण तापण्याची शक्यता आहे. मराठी सिनेमांसाठी लढणारे, मराठी सिनेमांना थिएटमध्ये शो मिळावे यासाठी आंदोलन करणारे अमेय खोपकर (Amey Khopkar) यांच्याच सिनेमाला आता स्क्रीन दिल्या जात नसल्यातं समोर आलंय. हा सिनेमा माझा असल्यानं, माझ्याच सिनेमासाठी मी आंदोलन करणार नाही, पण न इथून पुढे काचा फुटणार, असा इशारा मात्र त्यांनी मल्टीप्लेक्स मालकांना दिलाय.
‘सैयारा’साठी ‘ये रे येरे पैसा ३’ चे शो कमी करण्यात आल्यानंतर अमेय खोपकरांनी यावर संताप व्यक्त केलाय.माझ्या चित्रपटासाठी मी आंदोलन करणार नाही मात्र इथून पुढं काचा फुटणार, असं त्यांनी म्हटलं. खोपकर यांनी संजय राऊतांनी केलेल्या पाठराखणीसाठी आभार मानले आहेत, मात्र नितेश राणेंच्या भाषेवर नाराजी व्यक्त केली आहे.जी भाषा वापरलीय त्याप्रमाणे स्क्रीन मिळावी म्हणून सरकारदरबारी जावं लागणं हेच दूर्देवी असल्याचंही त्यांनी म्हटलं.
ये रे ये रे पैसा ३ ला चांगला प्रतिसाद मिळतोय. त्याच दिवशी सैयारा चित्रपटही प्रदर्शित झाला त्यालाही प्रतिसाद मिळाला . मात्र दुसऱ्या आठवड्यात थिएटरमध्ये अक्षरशः एकही शो दिलेला नाही. हा माझ्यावर असलेला राग मल्टीप्लेक्स वाल्यांनी काढलाय .माझ्या चित्रपटासाठी मीच आंदोलन करावं असं मला वाटत नाही मात्र इथून पुढं मल्टीप्लेक्सच्या काचा फुटतील,असं म्हणत त्यांनी पुन्हा खळखट्याक करण्याचा इशारा दिलाय.
संजय राऊतांनीही पक्ष न बघता ट्विट केलं. सुशांत शेलारांनीही पाठराखण केलीय त्यांचे आभार. ज्यांच्यासाठी मी आजवर उभा राहिलो, केसेस अंगावर घेतल्या ते आज एका शब्दानं बोलले नाहीत. जेव्हा स्वतःच्या चित्रपटाला थिएटर मिळत नाही तेव्हा शिवतीर्थवर येता ,आज तुम्ही एका शब्दानंही बोलत नाही, असं म्हणत खोपकर यांनी यावर व्यक्त न होणाऱ्या कलाकारांना टोला लगावला आहे.
