बृहन्मुंबई महानगरपालिका अंतर्गत २ मार्च व ८ मार्च २०२५ रोजी कनिष्ठ अभियंता (Junior Engineer) पदासाठी परीक्षा घेण्यात आली.या परीक्षेला आता पाच महिने उलटून गेले तरीदेखील अद्याप या परीक्षेचा निकाल जाहीर करण्यात आलेला नाही. ही बाब अत्यंत गंभीर आणि परीक्षार्थींच्या भविष्यासाठी अडचणीत टाकणारी आहे. त्यामुळे या परीक्षेचा निकाल ताबडतोब जाहीर करून निवड झालेल्या उमेदवारांना नियुक्ती द्यावी, अशी मागणी काँग्रेस प्रदेश सरचिटणीस धनंजय शिंदे यांनी मुंबई महानगरपालिका आयुक्त भूषण गगरानी यांच्याकडे केली आहे.
उमेदवारांनी ही परीक्षा देण्यासाठी नियोजनपूर्वक मेहनत केली असून प्रत्येक उमेदवाराने एक हजार रुपये एवढा परीक्षा शुल्क देखील भरले आहे. तरीदेखील ना निकाल जाहीर झालेला आहे, ना गुणपत्रक उपलब्ध करून देण्यात आले आहे. परीक्षार्थींकडून मिळालेल्या माहितीनुसार, निकाल रखडण्याचे कारण काही न्यायालयीन प्रकरणे असल्याचे सांगितले जात आहे. मात्र कुठल्याही अधिकृत न्यायालयीन स्थगिती आदेशाचा आधार सध्या तरी उपलब्ध नाही. अशा परिस्थितीत निकाल जाहीर करण्यात होत असलेला विलंब हा विद्यार्थ्यांच्या मानसिक तणावास कारणीभूत ठरत आहे, शिंदे यांनी निवेदनामध्ये नमूद केले आहे.
बृहन्मुंबई महानगरपालिका ही देशातील सर्वोच्च नागरी संस्थांपैकी एक असून, येथे नोकरी मिळवण्याचे स्वप्न घेऊन येणारे असंख्य गरीब, ग्रामीण भागातून आलेले मेहनती परीक्षार्थी आजही या निकालाच्या प्रतीक्षेत आहेत. त्यांच्या आशा आणि भविष्याचा विचार करून कनिष्ठ अभियंता परीक्षेचा निकाल तातडीने जाहीर करण्यात यावा. सर्व उमेदवारांना गुणपत्रक उपलब्ध करून देण्यात यावेत. निकाल रखडण्यामागची कारणे स्पष्ट व पारदर्शकपणे अधिकृत संकेतस्थळावर प्रसिद्ध करण्यात यावीत, अशी मागमी धनंजय शिंदे यांनी पालिका आयुक्त गगरानी यांच्याकडे केली आहे.
