राज्य परिवहन विभागाने ‘उच्च सुरक्षा नंबरप्लेट बसविण्यासाठी ३० नोव्हेंबरपर्यंत मुदतवाढ दिली आहे. त्यानंतर एक डिसेंबर २०२५ नंतर सुरक्षानंबर प्लेट न बसविणाऱ्या वाहनांवर वायुवेग पथकांमार्फत कारवाईला सुरुवात केली जाणार आहे. राज्यात २०१९ च्या पूर्वीच्या सर्व वाहनांना एचएसआरपी बसविणे सर्वोच्च न्यायालयाच्या आदेशानंतर बंधनकारक आहे. पुण्यात २६ लाखांपेक्षा जास्त वाहनांना ही नंबरप्लेट बसवावी लागणार आहे. त्यासाठी रोझमार्टा कंपनीला काम देण्यात आले असून ही नंबरप्लेट बसविण्याचे काम सुरू आहे. मात्र, वाहनसंख्या आणि त्या तुलनेत एचएसआरपी (HSRP) नंबर प्लेटची नोंदणी करून ती बसविण्यासाठी लागणारा कालावधी अधिक जात आहे. कंपनीकडून देखील नंबर प्लेट बसवण्यासाठी पुरेशी फिटमेंट सेंटर उभारण्यात आलेली नाहीत.
पुण्यात आतापर्यंत केवळ आठ लाख वाहन चालकांनी सुरक्षानंबर प्लेट साठी नोंदणी केली आहे. त्यामधील साडेपाच लाख वाहनांना नंबरप्लेट बसविण्यात आली आहे. त्यामुळे नंबरप्लेट बसवून घेण्याचा वेग कमी असून, अद्यापही १८ लाख वाहनांनी नोंदणी अर्ज दाखल करणे बाकी आहे; तसेच ज्या वाहनचालकांनी नंबर प्लेट बसविण्याची तारीख दिली ती ही सप्टेंबर आणि ऑक्टोबरपर्यंतची आहे. सध्या १५ ऑगस्टपर्यंत नंबरप्लेट बसविण्याची असलेली मुदत संपत आल्याने सुरक्षा नंबर प्लेट बसविण्यासाठी मुदतवाढ मिळावी, अशी मागणी केली जात होती.
त्यानुसार गुरुवारी परिवहन विभागाने ३० नोव्हेंबरपर्यंत नंबरप्लेट बसविण्यासाठी मुदतवाढ देण्याचा निर्णय घेतला आहे. मात्र, त्यानंतर नंबरप्लेट न बसवणाऱ्या वाहनांवर एक डिसेंबरपासून वायुवेग पथकांमार्फत कारवाई केली जाणार आहे. त्या वेळी वाहन जप्त करून त्याला नंबरप्लेट बसविल्याशिवाय ते सोडले जाणार नसल्याचे परिवहन आयुक्त विवेक भीमनवर यांनी काढलेल्या आदेशात म्हटले आहे.
आरटीओकडून कंपनीला सूचना
उच्च सुरक्षा नंबर प्लेटबाबत सुविधा वाढवाव्यात.
नंबरप्लेट बसविल्यानंतर त्याची नोंदणी वाहन पोर्टलवर त्याच दिवशी करावी.
नंबरप्लेट बसविण्याचे अर्ज भरून देण्यासाठी आठवडा बाजार, शासकीय कार्यालय, खासगी कार्यालय या ठिकाणी शिबिराचे आयोजन करावे.
