ठाकरे वाईल्डलाईफ फाऊंडेशनचे प्रमुख संशोधक तेजस ठाकरे आणि त्यांच्या ग्रुपने पुन्हा एकदा पश्चिम घाटातील जैवविविधतेच्या खजिन्यात मोलाची भर घातली आहे. कोल्हापूर जिल्ह्यातील तिलारी येथील निमसदाहरित जंगलामध्ये त्यांनी केसाळ गोगलगायींच्या एका नवीन प्रजातीचा (Tilari Hairy Snail) यशस्वीरित्या शोध लावला आहे. या महत्त्वपूर्ण शोधामुळे या लहान प्रजातींच्या अभ्यासाला नवी दिशा मिळाली आहे.
गोगलगायीच्या या नवीन प्रजातीचे शास्त्रीय नामकरण प्रसिद्ध जपानी अॅनिमेटर आणि स्टुडिओ घिबलीमधील सह-संस्थापक हायाओ मियाझाकी यांच्या नावावरून ‘लॅगोकाईलस हायाओमियाझाकी’ असे करण्यात आले आहे. मियाझाकी यांच्या चित्रपटांत निसर्गाचे महत्त्व सुंदरपणे दर्शविले जाते. त्या तत्त्वज्ञानाला आदरांजली म्हणून हे नामकरण करण्यात आले आहे. त्यांचा हा रिसर्च ‘जर्नल ऑफ कॉन्कॉलॉजी’ या आंतरराष्ट्रीय वैज्ञानिक मॅग्झिनमध्ये नुकताच प्रसिद्ध झाला आहे.
“लहान गोगलगायी निसर्गाचा अनमोल ठेवा आहेत आणि त्या अन्नसाखळीत महत्त्वाची भूमिका बजावतात. गोगलगायींसारख्या आकाराने लहान प्रजाती संशोधनाच्या दृष्टिकोनातून दुर्लक्षित राहिल्या आहेत. भविष्यात ठाकरे वाईल्डलाईफ फाऊंडेशनच्या माध्यमातून अशा प्रजातींच्या संशोधनावर भर दिला जाईल, अशी प्रतिक्रिया तेजस ठाकरे यांनी दिली.
त्यासोबत तेजस ठाकरे यांनी पालींच्या अनेक नवीन प्रजातींचा शोध लावला आहे. ज्यात ‘क्नेमास्पीस केव्हरनीकोला’ आणि ‘सी. पॅकामालियन्सेस’ यांचा समावेश आहे. तामिळनाडूच्या शेवरॉय पर्वतरांगेत सापडलेल्या ‘क्नेमास्पीस ठाकरेई’ या पालीच्या प्रजातीला तेजस ठाकरे यांच्या आडनावद्वारे नाव देण्यात आले आहे. तसेच त्यांनी गोड्या पाण्यातील 20 हून अधिक खेकड्यांच्या प्रजाती आणि एका नवीन प्रजातीचा शोध लावला आहे. यासोबतच सिंधुदुर्गातील आंबोली येथे हिरण्यकेशी नदीत ‘शिस्टुरा हिरण्यकेशी’ या सोनेरी रंगाच्या माशाच्या प्रजातीचा शोध लावून त्याचे यशस्वी नामकरण केले.
