उपमुख्यमंत्री एकनाथ शिंदे यांनी जव्हार येथे आयोजित प्रचारसभेत नगराध्यक्ष पदाच्या उमेदवार पद्मा गणेश राजपूत आणि त्यांच्या पॅनलच्या विजयासाठी आवाहन केले. यावेळी त्यांनी विकास, डेव्हलपमेंट या आपल्या अजेंड्यावर भर दिला. महाराष्ट्रातील महिलांना लखपती बनवण्याचे आपले ध्येय असल्याचे सांगताना, मुख्यमंत्री माझी लाडकी बहीण आणि लेक लाडकी लखपती या योजना कधीही बंद होणार नाहीत, असे आश्वासन त्यांनी दिले.
जव्हार शहराचा पर्यटन स्थळ म्हणून विकास करण्यावर, स्थानिकांना रोजगार उपलब्ध करून देण्यावर आणि आदिवासी बांधवांसाठी शिक्षण, आरोग्य व पायाभूत सुविधा पुरवण्यावर शासनाचे लक्ष केंद्रित असल्याचे शिंदेंनी नमूद केले. त्यांनी शासनाने पीएचडीसाठी १०० विद्यार्थ्यांना छात्रवृत्ती देण्याचा आणि आदिवासीबहुल गावात स्थानिकांना नोकरीत प्राधान्य देण्याचा निर्णय घेतल्याचे सांगितले. विकास हाच आपला मुख्य मुद्दा असल्याचे स्पष्ट करत, एकनाथ शिंदे यांनी दिलेल्या शब्दांचे पालन करण्यावर भर दिला.
