राजगडावर गेलेल्या सोळा पर्यटकांच्या ग्रुपवर रविवारी सकाळी अकराच्या सुमारास मधमाशांनी हल्ला केला. पर्यटक मुंबई आणि पुण्यातील होते. सुवेळा माचीवर फिरत असताना मधमाशांनी त्यांच्यावर हल्ला केला. हल्ल्यामध्ये चार पर्यटक गंभीर जखमी झाले आहेत. त्यांना पुढील उपचारांसाठी दवाखान्यात नेण्यात आले आहे.
मिळालेल्या माहितीनुसार, आज सकाळी ११ ते ११.३० च्या दरम्यान राजगडावरील सुवेळा माचीवर मधमाशांनी एका गृपवर हल्ला केला. पुरातत्व विभागाचे कर्मचारी बापू साबळे यांना माहिती मिळताच त्यांनी प्रशासन आणि बचाव पथकाशी संपर्क साधला. पर्यटकांची संख्या लक्षात घेऊन भोरचे उपविभागीय अधिकारी राजेंद्र कचरे आणि तहसीलदार दिनेश पारगे यांनी पोलीस आणि आरोग्य विभागाशी संपर्क साधला. पाली आणि वाजेघर गावातून काही लोक मदतीसाठी वर गेले. चादरीची झोळी करून जखमी चार जणांना खाली आणले. पायथ्याला रुग्णवाहिका आणली होती.
किल्ल्यावर कार्यरत असलेले पुरातत्व विभागाचे कर्मचारी बापू साबळे, आकाश कचरे, विशाल पिलावरे, पवन साखरे, दत्ता कचरे यांच्यासह स्थानिक नागरिकांनी मदत कार्य केले. सुवेळा माची आणि नेढे परिसरात अनेक ठिकाणी मधमाशांची पोळी आहेत. यापूर्वीही राजगडावर या भागात सिगारेट ओढल्याने धूर झाल्यामुळे तसेच गोंधळ केल्यामुळे मधमाशांनी हल्ला केल्याच्या घटना घडल्या आहेत. या पर्यटकांनी अंगावर मारलेल्या परफ्युमुळे मधमाशांनी हल्ला केला असावा, असा प्राथमिक अंदाज गावकऱ्यांनी सांगितले.
