नवरात्रोत्सव अवघ्या काही दिवसांवर येऊन ठेपलेला आहे. यामुळे साडेतीन शक्तीपीठांपैकी एक असलेल्या करवीर निवासिनी अंबाबाई मंदिरात लगबग सुरू झाली आहे. गेल्या आठवड्याभरापासून मंदिर स्वच्छता आणि रंगरंगोटीचे काम सुरू असून आज श्री अंबाबाईच्या नित्य आणि उत्सवकाळातील सोन्याच्या दागिन्यांची स्वच्छता करण्यात आली आहे. तर उद्या मंदिरातील मुख्य गाभाऱ्याची स्वच्छता करण्यात येणार असून यादरम्यान अंबाबाईच्या मुख्यमूर्तीचे दर्शन बंद ठेवण्यात येणार आहे. तर भाविकांसाठी देवीच्या उत्सव मूर्ती सरस्वती मंदिर येथे दर्शनासाठी ठेवण्यात येणार आहे.
येत्या १५ ऑक्टोंबरपासून शारदीय नवरात्रोत्सवाला प्रारंभ होत आहे. याच पार्श्वभूमीवर साडेतीन शक्तीपीठांपैकी एक असलेल्या करवीर निवासिनी अंबाबाई मंदिरात जय्यत तयारी सुरू आहे. काल शनिवारी देवीच्या नित्य आणि उत्सव काळातील चांदीच्या दागिन्यांची तर आज रविवारी देवीच्या मौल्यवान हिरेजडित सोन्याच्या दागिन्यांची स्वच्छता करण्यात आली आहे. नवरात्रोत्सवात देवीला नित्यालंकारामध्ये म्हाळुंग, बोरमाळ, कवड्याची माळ, पुतळ्याची माळ, ठुशी, कुंडल, १६ पदरी चंद्रहार, सोन किरीट, बोरमाळ, कर्णफुले, मासोळी, चाफेकळी हार; कोल्हापुरी साज; मंगळसुत्र; ११६ पुतळ्याची माळ, लप्पा, सात पदरी कंठी हे सर्व दागिने देवीला घालण्यात येत असतात.
दागिने तब्बल ३०० वर्षापूर्वीचे असल्याने त्यांची निगा आणि स्वच्छ्ता देखील खूप काळजी पूर्वक करण्यात येत असते. या सर्व देवीच्या सोन्या चांदीच्या दागिन्यांची स्वच्छता कोणतेही केमिकल नवापरता नैसर्गिकरित्या केली जाते. तर यावेळी देवीच्या सोन्याच्या पालखीचे ही स्वच्छ्ता करण्यात आले. गरुड मंडप येथे देवीच्या दागिन्यांची स्वच्छता सुरू असल्याने यावेळी येथे सुरक्षायंत्रणा कडक करण्यात आली होती. स्वच्छतेनंतर सर्व दागिने मंदिराच्या खजिनागृहात ठेवण्यात आले असून तब्बल सहा ते सात तास ही स्वच्छता मोहिम सुरू होती.
दरम्यान आठवड्याभरापासून सुरू असलेल्या मंदिर स्वच्छता आणि रंगरंगोटीचे काम हे अंतिम टप्प्यात आले आहे. उद्या सोमवारी मंदिराच्या मुख्य मुख्य गाभार्‍याची स्वच्छता करण्यात येणार असल्याने सकाळी ९:३० च्या आरतीनंतर श्री अंबाबाईचे मुख्य मूर्तीचे दर्शन बंद ठेवण्यात येणार आहे. संध्याकाळी ७ वाजेपर्यंत दर्शन बंद राहणार असून या दरम्यान येणाऱ्या भाविकांना अंबाबाईच्या गाभाऱ्यातील मुख्य मूर्तीचे दर्शन घेता येणार नाही. मात्र भाविकांसाठी देवीची उत्सवमूर्ती दर्शनासाठी सरस्वती मंदिर येथे ठेवण्यात येणार आहे. मुंबईतील आय स्मार्ट कंपनीच्या कर्मचाऱ्यांतर्फे आणि मंदिरातील कर्मचारी आणि पुजारी यांच्याकडून दिवसभर मंदिराच्या आतील भाग अत्याधुनिक यंत्रणेच्या सहाय्याने स्वच्छ करण्यात येणार आहे.
नवरात्रोत्सव काळात मोठ्या प्रमाणात भाविक श्री अंबाबाई मंदिरात दर्शनासाठी येत असतात. नवरात्रोत्सवाच्या पार्श्वभूमीवर पश्चिम महाराष्ट्र देवस्थान समितीच्या वतीने सुरक्षेची खबरदारी घेतली जात असून त्यासाठी मंदिराच्या पूर्व, दक्षिण आणि उत्तर दरवाजावर बॅग स्कॅनर बसविण्यात येत आहेत. तर गाभाऱ्यापर्यंत जाणाऱ्या पूर्व दरवाजाबाहेर स्टीलचे बॅरिकेटस बसविण्यात आले आहेत. शिवाय माजी खासदार संभाजीराजे यांच्या निधीतून आलेले साऊंड सिस्टीम ही मंदिर परिसरात बसविण्यात आले आहे. तर भाविकांना उन्हाचा त्रास होऊ नये, यासाठी पश्चिम महाराष्ट्रात व्यवस्थापन समितीकडून शेतकरी संघाची इमारत ताब्यात घेण्यात आली असून येथे बॅरिकेटिंग टाकून दर्शन रांग तयार करण्यात आले आहे. दोन मजली या इमारतीत भाविकांसाठी पिण्याच्या पाण्याची सोय व स्वच्छतागृहे तयार करण्यात आले आहे. भाविकांना उन्हाचा तडाका बसू नये, यासाठी पंखा आणि दर्शन रांगेत भाविकांना देवीची पूजा, गाभाऱ्यातील विधी दिसावेत, यासाठी एलईडी स्क्रीनदेखील लावण्यात येत आहेत.
