यू ट्यूबवर प्रश्नपत्रिका फुटल्याच्या अफवेमुळे देशभर घेण्यात येणारी एनसीसी ‘सी’ प्रमाणपत्र परीक्षा रविवारी एनसीसी मुख्यालयाने अचानक स्थगित केली. यामुळे कोल्हापूर शहरातील दोन केंद्रांवर ही परीक्षा देणाऱ्या सुमारे ८४० विद्यार्थ्यांना याचा फटका बसला आहे.आता ही परीक्षा २५ फेब्रवारी रोजी होणार आहे.
दरवर्षी ही परीक्षा फेब्रुवारी किंवा मार्च महिन्यात घेतली जाते. कोल्हापुरात शाहू कॉलेज आणि गोखले कॉलेजमध्ये रविवारी सकाळी १०:३० ते १ यावेळेत या परीक्षेचे आयोजन करण्यात आले होते. शाहू कॉलेजमधील ४५० आणि गोखले कॉलेजमधील ३९० विद्यार्थ्यांसह कोल्हापूर, सांगली, सातारा या तीन जिल्ह्यांतील पात्र सुमारे ८४० विद्यार्थी या परीक्षेला बसले होते.
कोल्हापुरातील एका कॉलेजच्या केंद्रावर सकाळी १०:३० वाजता पेपर होणार होते. तत्पूर्वीच प्रश्नपत्रिका यू ट्यूबवरून फुटल्याची अफवा पसरल्यामुळे एनसीसी मुख्यालयाकडून ही परीक्षा स्थगित करण्याचा आदेश सकाळी १० वाजता केंद्रप्रमुखांकडे आला.
एका कॉलेजमधील एका विद्यार्थ्याकडे ही प्रश्नपत्रिका मिळाल्याची तर प्रश्नपत्रिकेतील १६ ते १७ प्रश्न सिलॅबसबाहेरील छापल्यामुळे परीक्षा स्थगित केल्याची अफवा आहे. संबंधित दोन्ही केंद्रांवर सकाळी १० वाजताच तत्काळ ही प्रक्रिया थांबविण्याच्या सूचना मिळाल्याने ही परीक्षा स्थगित करण्यात आली आहे.
