राज्यातील सत्ताधारी महायुती सरकारमधील मंत्र्यांच्या विदेश दौऱ्यांवर होत असलेल्या टीकेच्या पार्श्वभूमीवर मुख्यमंत्री एकनाथ शिंदे यांनी आस्ते कदम भूमिका घेतल्याची माहिती मंत्रालयातील सूत्रांनी दिली. त्यामुळे मंत्र्यांनी पुढील वर्षी होणाऱ्या दावोस दौऱ्याशिवाय कोणताही विदेश दौरा आयोजित करू नये, अशी स्पष्ट सूचना मुख्यमंत्र्यांनी दिली आहे. त्यामुळे विदेश दौऱ्याच्या तयारीत असणाऱ्या अनेक मंत्री आणि अधिकाऱ्यांचे विमान जमिनीवर आले आहे.
राज्याचे उपमुख्यमंत्री देवेंद्र फडणवीस हे काही दिवसांपूर्वी जपान सरकारच्या निमंत्रणावरून दौऱ्यावर गेले होते. त्याचबरोबर उद्योगमंत्री उदय सामंत हे दहा दिवसांच्या युरोप दौऱ्यावर गेले होते. विधान परिषदेच्या उपसभापती नीलम गोऱ्हे व जवळपास २२ आमदारही विदेश दौऱ्यावर गेले होते. सत्ताधाऱ्यांच्या या दौऱ्यांवर शिवसेना (उद्धव बाळासाहेब ठाकरे) पक्षाचे नेते आदित्य ठाकरे यांनी टीका केली होती. आदित्य ठाकरे यांच्यासह विरोधी पक्षातील इतरही अनेक नेत्यांनी मंत्र्यांच्या या दौऱ्यावर आक्षेप नोंदिवला होता.
मंत्र्यांच्या विदेश दौऱ्यांवरून सत्ताधारी आणि विरोधकांमध्ये झालेल्या आरोप-प्रत्यारोपांची गंभीर दखल शिंदे यांनी घेतल्याची माहिती सूत्रांनी दिली. नववर्षात १४ ते १९ जानेवारीदरम्यान ‘वर्ल्ड इकोनॉमिक फोरम’च्या निमित्ताने दावोस दौरा करण्यात येणार आहे. या दौऱ्यासाठी मुख्यमंत्री, उपमुख्यमंत्री, उद्योगमंत्र्यांसह इतरही अनेक मंत्री जाण्याची शक्यता आहे. या दौऱ्यापर्यंत कोणताही वाद उद्भवू नये, यासाठी दावोस दौऱ्यापूर्वी इतर कोणत्याही विदेश दौऱ्याची आखणी करू नये, अशी सूचना मुख्यमंत्र्यांनी दिल्याचे कळते. शिंदे यांच्या या दौऱ्यामुळे विदेश दौऱ्याच्या तयारीत असणाऱ्या अनेक अधिकाऱ्यांसह मंत्र्यांच्या पदरी निराशा आल्याची चर्चा बुधवारी मंत्रालयात रंगताना दिसली.
‘विस्तृत अहवाल सादर करा’
मंत्र्यांचे विदेश दौरे विरोधकांकडून लक्ष्य करण्यात येत असतानाच राज्याच्या महिला आर्थिक विकास महामंडळाच्या कार्यक्रम व्यवस्थापक रूपा मेस्त्री या ८ ऑक्टोबर ते १४ ऑक्टोबर या काळात ट्युनिशिया दौऱ्यावर जाणार आहेत. त्यांच्या दौऱ्याला राज्य सरकारने नुकतीच मान्यता दिली आहे. प्रशिक्षण कार्यक्रमासाठी हा दौरा आयोजित केला असल्याने तो पूर्ण केल्यानंतर त्यांना विदेश दौऱ्याबद्दल विस्तृत अहवाल प्रशासकीय विभागास आणि सामान्य प्रशासन विभागास सादर करण्याची सूचना शासन निर्णयाच्या माध्यमातून जाहीर करण्यात आली आहे. तसेच या दौऱ्यात प्राप्त केलेल्या माहितीचा आणि कौशल्याचा वापर इतर अधिकारी, कर्मचाऱ्यांना प्रशिक्षण देण्यासाठी करण्याची सूचनाही यावेळी करण्यात आली आहे.
