रत्नागिरी-नागपूर महामार्गावर सांगली जिल्ह्यातील आगळगाव फाटा येथे भीषण अपघातामध्ये थांबलेल्या ट्रॅक्टरला भरधाव येणाऱ्या ट्रकने जोरदार धडक देऊन झालेल्या अपघातामध्ये मंगळवेढा तालुक्यातील चार जण ठार तर दहाजण जखमी झाले आहेत. मृतांमध्ये तिघे चिक्कलगीचे तर एकजण शिरनांदगी येथील समाविष्ट आहे.
त्यामध्ये शिरनांदगी येथील शालन दत्तात्रय खांडेकर (वय -३०) जगमा तम्मा हेगडे (वय-३५), दादा आप्पा ऐवळे (वय-१७), निलाबाई परशुराम ऐवळे (वय- ३) रा सर्वजण चिक्कलगी यांचा समावेश आहे. दोन महिला एक पुरुष आणि एक लहान मुलीचा समावेश आहे.
या सर्व घटनेच्या पार्श्वभूमीवर मृतांच्या नातेवाईकास ५ लाख, गंभीर जखमीस १ लाख तर किरकोळ जखमीस ५० हजार रुपये अशी शासकीय मदत जाहीर झाली असल्याची माहिती पंढरपूर- मंगळवेढा विधानसभा मतदारसंघाचे आमदार समाधान आवताडे यांनी दिली आहे. राज्य शासनाच्या ऊसतोड कामगार महामंडळाकडून राज्याचे मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजितदादा पवार यांच्या आदेशाने ही मदत त्वरित जाहीर झाली आहे.
