रुकडी-माणगाव रस्त्यावर भीषण अपघात घडला. हा अपघात इतका भीषण होता की त्यात माणगाव मधील युवक जागीच मृत झाला आहे. कॉलेजच्या बसने दुचाकीला समोरून जोराची धडक दिल्याने बसलेला मागे युवक ठार झाला. हर्षवर्धन विजय पाटील (वय २२, रा. माणगाव, ता. हातकणंगले) असे मृताचे नाव आहे. दुचाकीचालक सौरभ अण्णासो पाटील किरकोळ जखमी झाला. रुकडी- माणगाव रस्त्यावर मंगळवारी दुपारी चारच्या सुमारास हा अपघात झाला. हर्षवर्धन हा रुकडी येथील एका गॅरेजमध्ये कामाला होता. तो दुपारी जेवणासाठी माणगाव येथे घरी गेला होता.
जेवून दुपारी चार वाजता मोटारसायकलवरून मित्र सौरभसह रुकडी येथे गॅरेजवर कामासाठी निघाला होता. मोटारसायकल सौरभ चालवत होता. रुकडी-माणगाव रस्त्यावरील डप्पेदार विहिरीजवळ आले असता स्कूल बसने मोटारसायकलला समोरून जोराची धडक दिली. यामध्ये हर्षवर्धन हा डांबरी रस्त्यावर जोराने आपटल्याने त्याच्या डोक्याला गंभीर दुखापत होऊन मोठ्या प्रमाणात रक्तस्राव झाला. त्याला उपचारासाठी नेत असताना वाटेतच त्याचा मृत्यू झाला. अपघाताची नोंद हातकणंगले पोलिसांत झाली आहे.
