काल देशभर बकरी ईद मोठ्या उत्साहात साजरी करण्यात आली. इचलकरंजी व परिसरातील मुस्लिम बांधवांनी सोमवारी पवित्र बकरी ईद अर्थात ईद-उल-अजहा साजरी केली. स्टेशन रोडवरील ईदगाह मैदान येथे सकाळी सामुहिक नमाज पठण करण्यासाठी समाज बांधव जमले होते. यावेळी देशातील एकता व अखंडता कायम राहून दुष्काळासह सर्व संकटे दूर होण्यासाठी दुवापटण करण्यात आले. नमाजनंतर सर्वांनी एकमेकांना गळाभेट घेत ईदच्या शुभेच्छा दिल्या. ईदगाह मैदान येथे मुस्लिम बांधव नमाज पठण करण्यासाठी जमले होते.
यावेळी जवाहरनगर मस्जिदचे मुफ्ती युसूफ मोमीन यांनी बयान पठण तर नमाज व दुआ पठण चाँदतारा मस्जिदचे हाफिज इम्रान मुल्ला यांनी केले. हजरत सय्यद मखतूमवली दर्गा ट्रस्ट व इदगाह ट्रस्ट यांच्यावतीने नियोजन करण्यात आले होते. यावेळी प्रशासनाच्यावतीने अप्पर पोलीस अधीक्षक निकेश खाटमोडे, पोलीस उपअधीक्षक समीरसिंह साळवे, सर्व पोलीस ठाण्याचे प्रभारी अधिकारी यांनी मुस्लिम बांधवांना ईदच्या शुभेच्छा दिल्या.
