वाळवा ग्रामपंचायतच्यावतीने पावसाळ्याच्या पार्श्वभूमीवर गटारांची स्वच्छता मोहिम राबवण्यात येत आहे. सरपंच संदेश कांबळे, उपसरपंच हर्षवर्धन पाटील, ग्रामसेवक टी. जी. जरग यांनी स्वच्छता मोहिमेला गती दिली आहे. गावातील सर्व गटारी स्वच्छ करण्याच्या मोहीमेमुळे सर्वत्र समाधान व्यक्त होत आहे. सध्या माळभाग व पेठभाग येथे गटारी साफ करण्याचे काम सुरू आहे.
जवळपास १२ ते १५ कर्मचारी कार्यरत असून गटारीतला मैला काढून तो ट्रॅक्टरमध्ये भरून गावातील रस्त्याचे काम सुरू असलेल्या ठिकाणी कचऱ्यापासून भराव टाकण्यात येत आहे. पावससाळ्यात गटारातील घाण न काढल्यास गटारी तुंबून पाणी रस्त्यावर येते म्हणून ही काळजी घेतली आहे. असे सरपंच संदेश कांबळे यांनी सांगितले आहे. ग्रामपंचायत सदस्य मिलिंद थोरात, ग्रामपंचायत कर्मचारी रमेश जाधव यांच्या देखरेखीखाली काम सुरू आहे.
