भारत आणि पाकिस्तान हे दोन्ही संघ आता पुन्हा एकदा वर्ल्ड कपमध्ये एकमेकांसमोर उभे ठाकले जाऊ शकतात. या वर्ल्ड कपच्या सेमी फायनलमध्ये भारत आणि पाकिस्तान हे दोन्ही संघ एकमेकांना भिडू शकतात, असे समीकरण आता समोर येत आहे. कारण न्यूझीलंडच्या पराभवानंतर आता पॉइंट्स टेबलमध्ये मोठा बदल झाला आहे आणि ते पाकिस्तानच्या पथ्यावर पडले आहे.
सध्याच्या घडीला गुणतालिकेत पाकिस्तान आणि न्यूझीलंड यांचे समान सात सामने झाले आहेत. या वर्ल्ड कपमध्ये १० संघ आहेत आणि त्यामुळे प्रत्येक संघाला ९ सामने खेळावे लागणार आहेत. त्यामुळे आता न्यूझीलंड आणि पाकिस्तान या दोन्ही संघांचे दोन सामने बाकी आहेत. पाकिस्तानने ७ सामन्यांत तीन विजय मिळवले आहेत, तर त्यांना चार पराभव पत्करावे लागले आहेत. त्यामुळे पाकिस्तानच्या खात्यात आता सहा गुण झाले आहेत. दुसरीकडे न्यूझीलंडच्या संघाने सात सामन्यांमध्ये चार विजय मिळवले आहेत, तर त्यांना तीन पराभव पत्करावे लागले आहेत. त्यामुळे यानंतरच्या दोन्ही सामन्यांत पाकिस्तानने विजय मिळवला आणि न्यूझीलंडचा संघ दोन्ही सामने हरला तर पाकिस्तानच्या संघासाठी सेमी फायनलचे दरवाजे उघडू शकतात.
जर न्यूझीलंडने एक विजय साकारला आणि त्यांचा एक पराभव झाला तरी पाकिस्तानच्या संघाने रन रेट चांगला राखल्यास ते सेमी फायनलमध्ये पोहोचू शकतात. पण यासाठी त्यांना दोन्ही सामन्यांत विजय मिळवणे क्रमप्राप्त असेल. जर पाकिस्तानने एक जरी सामना गमावला तर त्यांचे आव्हान संपुष्टात येऊ शकते. पाकिस्तानचा संघ जर सेमी फायनलमध्ये पोहोचला तर तो गुणतालिकेत चौथ्या स्थानावर असेल. या वर्ल्ड कपमध्ये भारतीय संघ दमदार कामगिरी करत आहे आणि ते अपराजित आहेत. त्यामुळे त्यांनी जर अव्वल स्थान कायम राखले तर सेमी फायनलमध्ये भारत आणि पाकिस्तान समोरा समोर येऊ शकतात. कारण गुणतालिकेत जो संघ अव्वल स्थानावर असेल त्याचा सामान चौथ्या स्थानावर असलेल्या संघाशी होणार आहे. त्यामुळे भारत आणि पाकिस्तान हे सेमी फायनलमध्ये खेळू शकतात, असे आता समोर येत आहे.
पाकिस्तानचे आव्हान अजून संपलेले नाही. पण सेमी फायनलमध्ये पोहोचण्यासाठी त्यांना दोन्ही सामन्यांत विजय मिळवावे लागणार आहेत.
