पार्क स्टेडियमच्या फाटकासमोर सावजी हॉटेलजवळ एका इसमाच्या डोक्यावर प्रहार करुन त्याचा निर्घृण खून केल्याची घटना घडली. शुक्रवारी सकाळी साडेसातच्या सुमारास हा प्रकार घडल्याने खळबळ उडाली आहे. राजू कोंडिबा बंडगर (वय- 5 ५०, चिंचनगर, निराळे वस्ती) – असे मरण पावलेल्या व्यक्तीचे नाव आहे. शुक्रवारी सकाळी राजू बंडगर हे पार्क स्टेडियमसमोरुन जात असताना अज्ञात इसमाने त्यांच्या डोक्यावर अज्ञात वस्तूने प्रहार केला.
त्यात रक्तबंबाळ होऊन ते जमिनीवर कोसळले. त्यात ते गंभीर जखमी झाले. काही वेळातच हल्लेखोर तेथून पसार झाले. त्यांच्यावर हल्ला कोणी व कशासाठी केला हे समजू शकले नाही. या घटनेची माहिती मिळाल्यानंतर फौजदार चावडी पोलिसांनी तातडीने तेथे धाव घेऊन बंडगर यांना उपचारास शासकीय रुग्णालयात दाखल केले, परंतु उपचार चालू असताना त्यांचा मृत्यू झाला. याची माहिती त्यांच्या कुटुंबीयांनी समजल्यानंतर त्यांनी शासकीय रुग्णालयात धाव घेतली.
याप्रकरणी त्यांचा मुलगा धीरज राजू बंडगर (वय २४, रा. शनि मंदिराजवळ, रेल्वे कॉलनी) यांनी दिलेल्या फिर्यादीवरुन अज्ञात इसमाविरुध्द फौजदार चावडी पोलिसात गुन्हा दाखल झाला आहे. या घटनेबाबत फौजदार चावडी पोलिसांना संपर्क साधला असता, त्यांनी पुढील तपास सुरू असल्याचे बोलताना सांगितले. तपास सहायक पोलीस निरीक्षक बनसवडे हे करीत आहेत.
