आटपाडी येथील मेंढपाळ पट्ट्याला त्यांच्या ५१ लाखांच्या चॅम्पियन बकऱ्यापासून (Champion Goat) तीन वर्षांत झालेल्या २१ पिलांपासून तब्बल ६२ लाख रुपये मिळवलेत. या ‘चॅम्पियन’ बकऱ्याचा राज्यभर मेंढपाळात बोलबाला आहे. सांगोला येथील बाबू मेटकरी यांच्याकडे अत्यंत देखणा आणि अनेक स्पर्धेता गाजवलेला ‘मोदी’ बकरा होता.
आटपाडीचे सोमनाथ जाधव (Somnath Jadhav) यांनी त्यांच्या मेंढीला मोदी बकरा प्रजोत्पादनासाठी वापरला होता. त्याच्यापासून नर पिल्लू जन्माला आले.दरम्यान, ‘मोदी’ बकरा आजारी पडून मृत्यू झाला. २०१९ मध्ये येथील यात्रेत जाधव यांच्या अवघ्या दहा महिन्यांच्या बकऱ्याला १७ लाखांची मागणी झाली.
यात्रेतील स्पर्धेत बाजी मारत बकऱ्यांनी ‘चॅम्पियन’ नाव सार्थ ठरवले. त्यावेळी १७ लाखांची मागणी होऊनही विक्री न करता प्रजोत्पादनासाठी ठेवला. दरम्यान, ‘चॅम्पियन’ मोठा झाला. जाधव यांच्याकडे इतर देखण्या २५ मेंढ्याचा कळप आहे. या मेंढ्याच्या प्रजोत्पादनासाठी ‘चॅम्पियन’ बकरा वापरला. सध्या ‘चॅम्पियन’ सहा वर्षांचा झाला आहे.
गेल्या चार वर्षांत ‘चॅम्पियन’पासून तीन टप्प्यात कळपातील मेंढ्यापासून २१ नर पिल्ले जन्माला आलीत. या पिलांची तब्बल ६२ लाखांना विक्री झाली आहे. पहिल्या वर्षी दीड महिन्याची सात नर पिल्ले बारा लाखांना विकली. दुसऱ्या वर्षी चार महिन्यांची नऊ पिल्ले ३१ लाखांना तर यंदा नुकतीच चार महिन्याची पाच पिल्ली१९ लाखांना विकली गेलीत.
