राज्यात सर्वाधिक लक्षवेधी निवडणूक ही कोल्हापुरातील महाडिक आणि पाटील गटात होत असते. कोल्हापूर दक्षिण विधानसभा मतदारसंघ हा राज्यात नेहमीच मध्यभागी राहिला आहे. पैशाचा होणारा वारेमाप खर्च, कार्यकर्त्यांची टोकाची ईर्षा, आणि इच्छुक उमेदवारांनी लावलेल्या जोडण्या यावरच या मतदारसंघातील आमदार ठरत असतो.2014 ला देशात मोदी लाट असताना केवळ पंधरा दिवसात भाजपचा आमदार याच मतदारसंघातून निवडून आला आहे. शिवाय राजकीय वैरत्व असलेले महाडिक आणि पाटील गट हे दोनच या मतदारसंघात प्रबळ असल्याने पारंपारिक लढत पुन्हा एकदा होणार आहे. आगामी विधानसभा निवडणुकीच्या निमित्ताने गणेश उत्सवाचे अवचित्य साधून या मतदारसंघात प्रचाराचा नारळ फुटला आहे.
