भरधाव डस्टर चारचाकी गाडीने दुचाकीस समोरून जोराची धडक दिल्याने दुचाकीवरील एक जण जागीच ठार तर एक जण गंभीर जखमी झाला. ही घटना बुधवारी सायंकाळी साडेसातच्या सुमारास सांगोला जत रोडवरील सोनंद जवळील चव्हाण मळा येथे घडली आहे.
आनंद भीमराव चव्हाण वय 55 राहणार सोनंद हे या अपघातात मृत पावले असून सागर वसंत गळवे वय 25 राहणार सोनंद हे गंभीर जखमी झालेले आहेत. आनंद चव्हाण व सागर गळवे हे बुधवारी सायंकाळी साडेसातच्या सुमारास दुचाकीवरून आपल्या घरी जात असताना जतकडून सांगोलाकडे येणाऱ्या भरधाव डस्टर कारने दुचाकी समोरून जोराची धडक दिली.
या अपघातात दुचाकीवरील आनंद चव्हाण हे गंभीर जखमी होऊन जागीच ठार झाले. जखमी सागर गळवे यास अत्यवस्थ अवस्थेत सांगोला येथील खाजगी रुग्णालयात उपचारासाठी दाखल करण्यात आले आहे. सागर गळवे यांची प्रकृती गंभीर असून त्याच्यावर अतिदक्षता विभागात उपचार सुरू आहेत.
